Dekabrın 22-dən etibarən Azərbaycanda amnistiya aktının icrasına başlanılıb. Ədliyyə Nazirliyinin penitensiar müəssisələri üzrə ilkin məlumatına görə, amnistiya aktı ümumilikdə 8 minə yaxın məhkuma şamil ediləcək.

İlkin siyahıya əsasən, təxminən 5 min nəfərin azadlıqdan məhrumetmə cəzasından tam azad olunması, 3 minə yaxın məhkumun isə cəzasının 6 ay azaldılması nəzərdə tutulur.

Bu gün azadlığa buraxılması gözlənilənlər arasında 7 saylı məntəqə tipli cəzaçəkmə müəssisəsindən 20 nəfər, Bakı İstintaq Təcridxanasından 12 nəfər, yetkinlik yaşına çatmayanlar üçün nəzərdə tutulan penitensiar müəssisədən 3 nəfər, qadınlar üçün nəzərdə tutulan 4 saylı cəzaçəkmə müəssisəsindən isə 22 nəfər məhkum var.

Amnistiya aktına düşən şəxslər sırasında Novxanı–Sumqayıt yolunda baş verən yol-nəqliyyat hadisəsində 4 nəfərin ölümünə səbəb olmaqda təqsirləndirilən iş adamı və “Əlincə” futbol klubunun prezidenti Elşad Kəlbəliyev, Dövlət Gömrük Komitəsinin Aksizli Mallar üzrə Baş Gömrük İdarəsinin sabiq inspektoru Şahin İsgəndərov, Neftçala rayon icra hakimiyyəti başçısının sabiq müavini Gültəkin Sadıqova və digər şəxslərin adları yer alır.

Xatırladaq ki, amnistiya elan edilməsi təşəbbüsü ilə Prezident İlham Əliyev dekabrın 15-də çıxış edib. Dekabrın 19-da isə Milli Məclis “Konstitusiya və Suverenlik İli münasibətilə amnistiya elan edilməsi haqqında” qanun layihəsini qəbul edib.

Qanuna əsasən, Azərbaycanın suverenliyi və ərazi bütövlüyü uğrunda döyüşlərdə iştirak edənlər, bu əməliyyatlar zamanı həlak olmuş və ya itkin düşmüş şəxslərin yaxın qohumları, eləcə də mülki əhaliyə qarşı hərbi təxribatlar nəticəsində əlil olan şəxslər cəzadan və ya cinayət məsuliyyətindən azad edilə bilər. Amnistiya həmçinin qadınlara, 60 yaşdan yuxarı şəxslərə və cinayət törədərkən yetkinlik yaşına çatmayanlara da şamil olunur.

Bununla yanaşı, müstəqil hüquqşünaslar bildirirlər ki, beynəlxalq təşkilatlar tərəfindən siyasi məhbus kimi tanınan şəxslərin əksəriyyəti ağır və ya xüsusilə ağır cinayətlərdə ittiham olunduqları üçün bu amnistiyadan yararlanmaq ehtimalları olduqca məhduddur.