Baş Prokurorluq tərəfindən qaçaqmalçılıq və vəzifə səlahiyyətlərindən sui-istifadə faktları ilə bağlı aparılan genişmiqyaslı istintaq çərçivəsində tanınmış iş adamı Ruslan Eyyubov saxlanılıb.

Baş Prokurorluğun yaydığı məlumata görə, istintaq Baş prokuror yanında Korrupsiyaya qarşı Mübarizə Baş İdarəsində Dövlət Gömrük Komitəsinin aidiyyəti strukturlarının və “Bakı Hövsan Beynəlxalq Ticarət Dəniz Limanı” ASC-nin vəzifəli şəxslərinin qanunsuz əməlləri ilə bağlı aparılır.

İstintaq materiallarına əsasən, Ruslan Eyyubov və digər təqsirləndirilən şəxslər mütəşəkkil dəstə halında Birləşmiş Ərəb Əmirlikləri və İran İslam Respublikasından ümumi dəyəri 5,4 milyon manatdan artıq olan, aksiz markası ilə markalanmalı tütün məmulatlarını markasız şəkildə gəmi yolu ilə ölkəyə qaçaqmalçılıqla gətirməkdə şübhəli bilinirlər.

Toplanmış ilkin sübutlar əsasında Ruslan Eyyubov da daxil olmaqla bir sıra şəxslər Cinayət Məcəlləsinin 206.4 (mütəşəkkil dəstə tərkibində külli miqdarda qaçaqmalçılıq), 213-1.2-ci maddələri (aksiz markası olmadan malların satışı məqsədilə saxlanılması) və 308.2-ci maddəsi (ağır nəticələrə səbəb olmaqla vəzifə səlahiyyətlərindən sui-istifadə) ilə təqsirləndirilən şəxs qismində cəlb olunublar.

Məhkəmənin qərarı ilə Ruslan Eyyubov barəsində həbs qətimkan tədbiri seçilib. Eyni cinayət işi üzrə “Bakı Hövsan Beynəlxalq Ticarət Dəniz Limanı” ASC-nin baş direktoru Rəşad Daşdəmirov və digər vəzifəli şəxslər də daha əvvəl həbs ediliblər. Bir neçə şübhəli şəxs barəsində isə qiyabi həbs qərarı çıxarılaraq beynəlxalq axtarış elan olunub.

Qeyd edək ki, Ruslan Eyyubov Dövlət Gömrük Komitəsinin Dəniz Nəqliyyatı və Enerji Resursları Baş Gömrük İdarəsinin sabiq rəisi, general-mayor Həsən Eyyubovun qardaşıdır. Onlar Prezidentin Mühafizə Xidmətinin keçmiş rəisi, hazırda Prezidentin Katibliyinin rəisi olan general-polkovnik Bəylər Eyyubovun qardaşı oğlanlarıdır.

İstintaq tədbirləri davam etdirilir, cinayət işinin nəticələri barədə əlavə məlumatın veriləcəyi bildirilir.