“Toplum TV işi” üzrə həbsdə olan III Respublika Platformasının qurucu üzvü Ruslan İzzətlinin səhhətinin pisləşdiyi bildirilir. Bu barədə dekabrın 20-də onunla təcridxanada görüşən həyat yoldaşı Günel Manaflı məlumat yayıb.

Onun sözlərinə görə, Ruslan İzzətlinin ödündə olan problemlər kəskinləşib və bu vəziyyət artıq onun xarici görünüşündə də özünü göstərir. G.Manaflı qeyd edib ki, həyat yoldaşı “yaxşıyam” desə də, üzündə şişkinlik, rəngində solğunluq və gözlərində qızartı müşahidə olunub.

“Həkimlərin verdiyi ağrıkəsicilər artıq mədəsində əlavə problemlər yaratdığı üçün bir neçə gündür onlardan da imtina edib və şiddətli öd ağrılarına dözməyə məcbur qalır. Bu vəziyyət həyati təhlükə yaradır. Qan zəhərlənməsi riski var”, – deyə o bildirib.

G.Manaflının sözlərinə görə, Ruslan İzzətliyə təcili olaraq əməliyyat olunmalı və öd kisəsi çıxarılmalıdır. O, əməliyyatın etibar etdikləri klinikada və həkim tərəfindən aparılması üçün həyat yoldaşının azadlığa buraxılmasını tələb edib.

“Burada söhbət gənc bir insanın, sağlamlığını döyüş meydanında qoymuş bir müharibə veteranının həyatından gedir. Etinasız qalmayın”, – deyə o əlavə edib.

Qeyd edək ki, “Toplum TV işi” üzrə ümumilikdə 10 nəfər barəsində cinayət işi açılıb. Təqsirləndirilən şəxslər əvvəlcə qaçaqmalçılıqda ittiham edilsələr də, sonradan ittihamlar ağırlaşdırılıb. Onlar ittihamları rədd edir və həbslərinin siyasi sifarişlə həyata keçirildiyini bildirirlər.