Bu gün, dekabrın 25-də “Azərbaycan Hava Yolları” QSC-yə (AZAL) məxsus sərnişin təyyarəsinin Qazaxıstanın Aktau şəhəri yaxınlığında qəzaya uğramasından bir il keçir.

Faciə 2024-cü il dekabrın 25-də Bakı–Qroznı reysi ilə uçan “Embraer 190” tipli təyyarə ilə baş vermişdi. Təyyarə Xəzər dənizi üzərində olarkən “SOS” siqnalı verərək Aktau hava limanına təcili eniş etməyə cəhd göstərsə də, yerə çırpılmışdı. Qəza nəticəsində göyərtədə olan 67 nəfərdən 38-i həlak olmuş, 29 nəfər sağ qalmışdı.

İlkin baxış zamanı təyyarənin gövdəsində çoxsaylı deşiklər və ciddi zədələr aşkarlanmış, bu isə hadisənin təkcə texniki nasazlıqdan deyil, kənar fiziki təsirdən qaynaqlana biləcəyi ehtimalını gündəmə gətirmişdi. Qəza ilə bağlı Azərbaycanda, Qazaxıstanda və Rusiyada cinayət işləri açılmışdı.

Hadisədən dərhal sonra Qazaxıstanın müvafiq qurumları genişmiqyaslı xilasetmə əməliyyatına başlamış, “qara qutu”lar tapılaraq istintaqa cəlb edilmişdi. Dekabrın 26-da Azərbaycanda, dekabrın 28-də isə Çeçenistan Respublikasında matəm elan olunmuşdu.

Qəza xəbərindən sonra Prezident İlham Əliyev MDB dövlət başçılarının qeyri-rəsmi Zirvə görüşündə iştirak üçün Rusiyaya səfərini yarımçıq qoyaraq Bakıya qayıtmış, hava limanında dərhal müşavirə keçirmişdi. Dövlət başçısının tapşırığı ilə Baş nazir Əli Əsədovun rəhbərliyi altında Dövlət Komissiyası yaradılmışdı.

Prezident İlham Əliyevin Sərəncamı ilə həlak olan ekipaj üzvlərinə Azərbaycanın Milli Qəhrəmanı adı verilmiş, sağ qalan ekipaj üzvləri isə 1-ci dərəcəli “Rəşadət” ordeni ilə təltif edilmişdi.

2025-ci il oktyabrın 9-da Düşənbədə Azərbaycan Prezidenti İlham Əliyevlə Rusiya Prezidenti Vladimir Putin arasında keçirilən görüşdə Rusiya tərəfi istintaqın başa çatmaq üzrə olduğunu, kompensasiya məsələləri ilə bağlı addımlar atılacağını və günahkar şəxslərin hüquqi qiymət alacağını bildirmişdi.

AZAL təyyarəsinin Aktau yaxınlığında baş verən qəzası Azərbaycan aviasiya tarixində ən ağır faciələrdən biri kimi yadda qalıb.