Dekabrın 22-də Almaniyada yaşayan azərbaycanlı mühacirlər tərəfindən yaradılmış “Demokratik Azərbaycanı Seç” (DAS) təşkilatının üzvləri Berlində etiraz aksiyası keçiriblər.

Aksiyalar Almaniyanın Xarici İşlər Nazirliyi və Avropa Birliyinin Berlin nümayəndəliyinin binaları qarşısında baş tutub.

Təşkilatçıların verdiyi məlumata görə, aksiyanın əsas məqsədi Azərbaycanda insan hüquqlarının pozulmasına, xüsusilə jurnalistlərin və siyasi fəalların həbslərinə, söz və media azadlığının məhdudlaşdırılmasına beynəlxalq ictimaiyyətin diqqətini cəlb etmək olub.

Eyni zamanda, Azərbaycan Xalq Cəbhəsi Partiyasının (AXCP) üzvü Elbəyi Kərimlinin 2 saylı Cəzaçəkmə Müəssisəsində baş vermiş müəmmalı ölümü və AXCP sədri Əli Kərimlinin həbsi ilə bağlı narahatlıqlar da aksiyada gündəmə gətirilib.

Aksiya iştirakçıları siyasi məhbuslara azadlıq verilməsi, eləcə də azad medianın bərpası tələbi ilə çıxış ediblər.

Məlumata görə, yaxın günlərdə etiraz aksiyalarının Azərbaycan səfirliyi, Birləşmiş Millətlər Təşkilatı və Almaniya Bundestaqı qarşısında da keçirilməsi planlaşdırılır.

Vəli Şükürov