Milli Məclisin qarşısına dinc etiraz aksiyasını işıqlandırmaq üçün getmişdim. Saxlanılan vətəndaşları lentə aldığım sırada 99 - AP - 634 nömrəli PPX maşını sol ayağımın üstünə çıxdı. Bir neçə dəfə "ayağımın üstünə çıxdınız" deyə qışqırsam da polis ayağımın üzərindən çəkmədi maşını. Yalnız digər polislərin müdaxiləsindən sonra maşını arxaya sürdü.

Ayağım şişib, üstünə basa bilmirəm. Gəldik Travmatologiya Xəstəxanasına. Polis xəstəxanaya bizdən qabaq çatmışdı, hər yerə bizim yanımızda gedirdi. Rentgen müayinəsindən keçəndən sonra həkim bizə nə rentgenin nəticəsini, nə də xəsarətlə bağlı rəyi vermədi. Bircə onu dedi ki, ayağımda xırda qırıq və ya çat varsa onu həmin xəstəxanadakı rentgen aparatı müəyyən edə bilmir.

İndi təkrar müayinə üçün özəl klinikaya gedirəm.

Mən peşə fəaliyyətimi yerinə yetirərkən polis tərəfindən xəsarət almışam. Bunun qəsdən edildiyini düşünürəm. Məsələ ilə bağlı bütün hüquqi addımları atacağam.



Fatima Movlamli