USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Cavid Ağa dövlətə xəyanət ittihamı ilə həbs edilən Bəhruz Səmədovun işi üzrə dindirilib
Fəal Cavid Ağa dövlətə xəyanət ittihamı ilə həbs edilən araşdırmaçı Bəhruz Səmədovun işi üzrə şahid qismində dindirilib.
Bu barədə axşam saatlarında Ağa özü Facebook-da yazıb.
«Salam dostlar, bu səhər Litvaya təhsilə getməli idim amma alınmadı. Bəhruz Səmədov işi ilə bağlı şahid qismində ifadəyə dəvət edilmişəm. İstintaq davam etdiyi üçün əlavə məlumat verə bilmirəm. Gecə saat 3dən bəri yuxusuz olduğum üçün indi evə qayıdıram. Onu deyə bilərəm ki, mənə qarşı zorakılıq olmadı və təhlükədə deyiləm».
Səhər saatlarından fəal və araşdırmaçı Cavid Ağa ilə əlaqə saxlamaq mümkün deyil.
Sosial şəbəkələrdəki məlumata görə, Ağa təhsilini davam etdirmək üçün bu səhər saat 06:50-də Bakıdan xaricə getməliydi.
Ancaq pasport nəzarətindən keçməsilə bağlı yaxınlarına və dostlarına bir şey deməyib.
Eyni zamanda, onun gedəcəyi reysin aid olduğu aviaşirkətdən fəalın dostlarına bildiriblər ki, Aga təyyarəyə minməyib.
Həmkarları Ağanın saxlanıla biləcəyindən narahatdırlar.
Ağa fəal, sosial şəbəkələr meneceri, fəlsəfi problemlərin araşdırmaçısı kimi tanınır. Bu mövzularda məqalələr və şərhlərlə yerli və xarici mətbuatda çıxış edib. 2020-ci ildə Qarabağda 44 günlük müharibə zamanı sosial şəbəkələrdə pasifist mövqe nümayiş etdirib.
Hüquq-mühafizə orqanları Cavid Ağanın yoxa çıxması ilə bağlı xəbərləri şərh etmirlər.
