“Məhkəmə prosesinin mayın 6-na təyin edilməsi isə İlham Əliyevin Tofiq Yaqublu barəsində ölüm fərmanıdır”

24 gündür aclıq edən Müsavat Partiyasının və Milli Şuranın üzvü Tofiq Yaqublunun apelyasiya məhkəməsi mayın 6-na təyin olunub.

Bu barədə Tofiq Yaqublunun qızı Nigar Həzi özünün “Facebook” səhifəsində vəkil Nemət Kərimliyə istinadən yazıb.

Prosesə sədrliyi Zamin İbrahimov edəcək.

“Günlər keçdikcə Tofiq Yaqublunun vəziyyəti daha da kritikləşir. Bu gün 24 gündür ki, o, aclıq edir. Bu qədər aclıq 65 yaşlı Tofiq Yaqublu üçün ölüm siqnalıdır. Hər an həyatına elə təhlükə ola bilər ki, onu itirərik. Ancaq aclıqdan 24 gün keçməsinə baxmayaraq Tofiq Yaqublunu nə mülki xəstəxanaya köçürürlər, nə də həkimi Adil Qeybullanın davamlı müayinəsinə icazə verirlər. Məhkəmə prosesinin mayın 6-na təyin edilməsi isə İlham Əliyevin Tofiq Yaqublu barəsində ölüm fərmanıdır. Atamın həyatına görə İlham Əliyev başda olmaq bütün Azərbaycan hakimiyyəti məsuliyyət daşıyır”, – Tofiq Yaqublunun qızı Nigar Həzi bildirib.

Tofiq Yaqublu 2023-cü il dekabrın 14-də həbs edilib. Ona qarşı Cinayət Məcəlləsinin 178.3.2-ci (dələduzluq – külli miqdarda ziyan vurmaqla törədildikdə), 320-ci (rəsmi sənədləri, dövlət təltiflərini, möhürləri, ştampları, blankları saxtalaşdırma, qanunsuz hazırlama, satma və ya saxta sənədlərdən istifadə etmə), 320.1-ci (hüquq verən və ya vəzifədən azad edən vəsiqəni və ya digər rəsmi sənədi istifadə etmək məqsədi ilə saxtalaşdırma və ya qanunsuz hazırlama, yaxud bu cür sənədi satma, habelə eyni məqsədlə Azərbaycan Respublikasının saxta dövlət təltifini, ştampı, möhürü, blankı hazırlama və ya satma) və 320.2-ci (bu Məcəllənin 320.1-ci maddəsində göstərilmiş bilə-bilə saxta sənədlərdən istifadə etmə) maddələri ilə ittiham irəli sürülüb.

2025-ci il martın 10-da Bakı Ağır Cinayətlər Məhkəməsi Tofiq Yaqublunu 9 il azadlıqdan məhrum edib. O, qərara etiraz olaraq aprelin 1-dən aclıq elan edir.