İmişlidə 9 May Qələbə günü münasibətilə keçirilən tədbir zamanı SSRİ bayrağının qaldırılması geniş rezonans doğurub. Hadisə rayonun Sarıxanlı kəndində, İkinci Dünya müharibəsi xatirə kompleksində baş verib. Tədbirin təşkili və SSRİ bayrağının fonunda “Georgi lenti” ilə çıxış edən şəxs – Rayon Ağsaqqallar Şurasının sədri Saleh Səmədov olub. Sosial şəbəkələrdə yayılan görüntülər cəmiyyətin müxtəlif təbəqələri tərəfindən birmənalı qarşılanmayıb.

Kimdir Saleh Səmədov?

1962-ci ildə İmişli rayonunun Qaralar kəndində anadan olan Saleh Səmədov Azərbaycan Xalq Təsərrüfatı İnstitutu və Azərbaycan Respublikası Prezidenti yanında İdarəetmə Akademiyasının məzunudur. O, AXC-Müsavat hakimiyyəti dövründə Bakı Bazarlar İdarəsinin rəisi vəzifəsində çalışıb. Həmin illərdə daxili işlər naziri İsgəndər Həmidova yaxınlığı ilə tanınıb.

AXC hakimiyyəti süqut etdikdən sonra isə Səmədov siyasi mövqeyini dəyişərək Yeni Azərbaycan Partiyasına (YAP) qoşulub və dövlət idarəçiliyində müxtəlif mühüm vəzifələrdə çalışıb. Bunlara Bakı şəhəri üzrə müxtəlif ticarət və ekspertiza idarələrinin rəhbərliyi, İmişli və Naftalan rayon icra hakimiyyətlərində başçı müavini postları daxildir.

“Araz” MMC və biznes imperiyası

2003-cü ildə o, “Araz” MMC-ni təsis edib. Bu şirkətə “İmişli Konservləşdirilmiş Şirələr və Spirtli İçkilər Zavodu”, “Kral” şadlıq sarayı, nar bağları və istixanalar daxildir. Əldə etdiyimiz məlumata görə, Saleh Səmədovun hazırda istifadə etdiyi mobil nömrə Rusiyanın “Beeline” operatoruna məxsusdur və bu fakt sosial şəbəkələrdə onun Rusiya ilə mümkün əlaqələri barədə iddialara səbəb olub.

Ailə və yaxınlar

Saleh Səmədovun oğlu Toğrul Səmədov Ədliyyə Nazirliyinin Penitensiar Xidmətində rəhbər vəzifə tutur – o, Şabranda yerləşən məntəqə tipli cəzaçəkmə müəssisəsinin rəisidir.

Qardaşları ilə bağlı isə mübahisəli məlumatlar yayılıb. Böyük qardaşı Əziz Səmədov mənzil dələduzluğuna görə 5 il 6 ay müddətinə azadlıqdan məhrum olunub və hazırda cəza çəkir. Digər qardaşı Sahib Səmədov barəsində İmişli və Saatlı rayonlarında hüquq-mühafizə orqanları tərəfindən təhqiqat aparılır. Kiçik qardaşı Vahab Səmədov isə pis vərdişlərə aludə olduğu bildirilir.

Rusiyada şaxələnmiş biznes şəbəkəsi

Saleh Səmədovun biznes fəaliyyəti yalnız Azərbaycanda deyil, Rusiyada da genişlənib. Onun Şimali Qafqazın Kislovodsk və Eesentuki şəhərlərində “Starıy Baku” restoranlar şəbəkəsi, “İstok” sanatoriyası və un dəyirmanları fəaliyyət göstərir.

Bundan əlavə, o, Bakı şəhərində yerləşən və Cəlil Məmmədquluzadə küçəsində inşa edilən göydələnin tikintisini həyata keçirən “Pilot” MTK-nın da şəriklərindəndir. Bu layihədə onun ortaq şəxsləri kimi tanınmış iş adamları Vüqar Qasımov və Aslan Manafov qeyd olunur.

Saleh Səmədov nə dedi?

Mövzu ilə bağlı Saleh Səmədovla əlaqə saxlayan əməkdaşımıza o, qısa cavab verib: “İşinizlə məşğul olun.”

Bütün bu faktlar bir daha göstərir ki, Saleh Səmədovun fəaliyyəti yalnız İmişli ilə məhdudlaşmır. Onun həm siyasi keçmişi, həm də ölkə daxilində və xaricində qurduğu biznes şəbəkəsi ictimaiyyət üçün maraqlı və araşdırılmağa dəyər bir mövzu olaraq qalır.