USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
“Toplum TV işi” üzrə növbəti məhkəmə prosesi keçirilib
Mayın 19-da Bakı Ağır Cinayətlər Məhkəməsində “Toplum TV işi” üzrə növbəti məhkəmə prosesi baş tutub. Prosesə hakim Azər Tağıyev sədrlik edib.
Məhkəmə iclasında ittiham aktının bir hissəsi elan olunub. Bu hissə “Toplum TV”nin həmtəsisçisi Ələsgər Məmmədli və Demokratik Təşəbbüslər İnstitutunun direktoru Akif Qurbanova aid olub.
İclas zamanı Ələsgər Məmmədli və III Respublika Platformasının qurucu üzvü Ruslan İzzətlinin vəkilləri onların barəsində seçilmiş həbs qətimkan tədbirinin ev dustaqlığı ilə əvəz olunması barədə vəsatət qaldırıblar. Lakin məhkəmə vəsatətləri təmin etməyib.
Növbəti məhkəmə prosesi iyunun 2-nə təyin olunub.
“Toplum TV işi” çərçivəsində ümumilikdə 10 nəfərə qarşı cinayət işi açılıb. Həbsdə olan şəxslər sırasında “Toplum TV”nin həmtəsisçisi Ələsgər Məmmədli, jurnalistlər Müşfiq Cabbar və Fərid İsmayılov, Demokratik Təşəbbüslər İnstitutunun rəhbəri və III Respublika Platformasının spikeri Akif Qurbanov, platformanın qurucu üzvü Ruslan İzzətli, institut əməkdaşları Əli Zeynal, Ramil Babayev və İlkin Əmrahov yer alır.
Jurnalist Elmir Abbasov barəsində polis nəzarəti qətimkan tədbiri seçilib, Şahnaz Bəylərqızı isə ev dustaqlığına buraxılıb.
Başlanğıcda saxlanılan şəxslərə qarşı qaçaqmalçılıq ittihamı irəli sürülsə də, daha sonra bu ittiham ağırlaşdırılıb. Təqsirləndirilən şəxslər ittihamları qəbul etmir və həbsin siyasi sifariş əsasında həyata keçirildiyini bildirirlər.
