“İşçi Masası” Həmkarlar İttifaqları Konfederasiyasının sədri Afiəddin Məmmədovun həbsxanada müəssisə rəhbərliyi tərəfindən təhdid edildiyi açıqlanıb. Bu barədə Konfederasiya iyunun 6-da yaydığı bəyanatda məlumat verib.

Bəyanatda qeyd edilir ki, Afiəddin Məmmədov saxlanıldığı 2 saylı Cəzaçəkmə Müəssisəsindəki antisanitar şəraiti ictimailəşdirdikdən sonra ona qarşı təzyiqlər başlayıb. Bildirilir ki, müəssisə rəhbərliyi tərəfindən Məmmədov daha ağır rejimli cəzaçəkmə müəssisəsinə köçürülməklə hədələnib.

“Siçanlar mətbəxdə sərbəst gəzir”

Fəalın məlumatına görə, müəssisədə 250-dən çox məhbus üçün cəmi dörd sanitar qovşağı var. Bundan əlavə, mətbəxdə siçanların sərbəst dolaşdığı qeyd olunub. Afiəddin Məmmədov bu halların insan ləyaqətinə zidd olduğunu bildirib və şəraitin yaxşılaşdırılması ilə bağlı məsələ qaldırıb.

8 il həbs cəzası

Afiəddin Məmmədov 2023-cü ilin sentyabrın 20-də həbs olunub. Ona qarşı Cinayət Məcəlləsinin 126.2.3 (xuliqanlıq niyyəti ilə qəsdən sağlamlığa ağır zərər vurma) və 221.3-cü (silah və ya silah qismində istifadə olunan əşyadan istifadə etməklə xuliqanlıq) maddələri ilə ittiham irəli sürülüb. 2024-cü ilin yanvarında Bakı Ağır Cinayətlər Məhkəməsinin hökmü ilə 8 il azadlıqdan məhrum edilib.

Məmmədov 2023-cü ildə kuryerlərin mopedlərinin kütləvi şəkildə cərimə meydançasına aparılmasına qarşı keçirilən etiraz aksiyasında saxlanılıb və ilk dəfə 30 sutka inzibati həbs cəzası almışdı. Ardınca Konfederasiyanın digər üzvləri Elvin Mustafayev və Ayxan İsrafilov da narkotik ittihamı ilə həbs olunublar.

Hüquq müdafiəçiləri təzyiqlərdən narahatdır

Hüquq müdafiəçiləri Afiəddin Məmmədovun işini siyasi motivli hesab edir və onun sindikat fəaliyyəti və sosial haqsızlıqlara qarşı mübarizəsinə görə cəzalandırıldığını bildirirlər. “İşçi Masası” da onu vicdan məhbusu kimi tanıyır və beynəlxalq təşkilatlara müraciət edərək ona qarşı təzyiqlərə son qoyulmasını tələb edir.