USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Müsavat Partiyasının Məclis üzvləri həbs edildi: Partiya hökmü repressiya kimi qiymətləndirir
Müsavat Partiyasının Məclis üzvləri Ələddin Ələsgərli, Qoşqar Nuralı və partiya fəalı Cabir Vəliyev barəsində açılmış cinayət işi üzrə məhkəmə prosesi yekunlaşıb. Partiyanın rəsmi “Facebook” səhifəsində yayılan məlumata görə, Ələsgərli və Vəliyev 2 il 3 ay, Nuralı isə 2 il müddətinə azadlıqdan məhrum edilib.
Onlar bir qrup şəxs tərəfindən törədilən xuliqanlıqda təqsirli biliniblər. Cinayət işinin açılmasına səbəb kimi 2023-cü il dekabrın 31-də Müsavat Partiyasının Biləsuvar rayon təşkilatı tərəfindən təşkil olunan bayram tədbirindən sonra baş verən insident göstərilir.
Partiyanın yaydığı bəyanatda bildirilir ki, həmin gün müsavatçılara qarşı təxribat təşkil olunub, lakin məhkəmə bu hadisədə təxribatçıları cərimə etməklə kifayətlənib. Halbuki, Ələddin Ələsgərliyə xəsarət yetirildiyi rəsmi tibbi ekspertiza tərəfindən təsdiqlənib. Partiya hesab edir ki, müsavatçıların həbsi əsassız olub və siyasi sifariş nəticəsində həyata keçirilib.
Müsavat Partiyası bu hökmü Azərbaycanda siyasi repressiyaların davamı kimi qiymətləndirir və həbs olunan şəxslərin dərhal azadlığa buraxılmasını tələb edir.
