Rusiyanın Azərbaycandakı səfirliyi bəyanat yayaraq ölkədə olan rus vətəndaşlarına qarşı fiziki zorakılıq halları ilə bağlı narahatlığını ifadə edib.

İyulun 2-də yayımlanan bəyanatda qeyd olunub ki, səfirlik son 24 saat ərzində Azərbaycanda yaşayan və ya turizm məqsədilə səfər edən Rusiya vətəndaşlarından çoxsaylı şikayətlər alıb.

“Müraciət edən şəxslərin sözlərinə görə, yaşadıqları ünvanlara mülki geyimli şəxslər gəlib. Onlar bəzi hallarda özlərini polis əməkdaşı kimi təqdim ediblər. Rus vətəndaşlarının sənədləri yoxlanılıb, ölkədə qalma məqsədləri ilə bağlı suallar verilib. Bəzi hallarda isə onlara və ailə üzvlərinə fiziki zorakılıq tətbiq edildiyi bildirilib”, – deyə bəyanatda vurğulanır.

Səfirlik, həmçinin, son günlərdə Azərbaycanda həbs olunan rus vətəndaşları ilə bağlı Azərbaycan Xarici İşlər Nazirliyinə (XİN) nota təqdim edildiyini, lakin hələlik cavab alınmadığını açıqlayıb. Onların arasında “Sputnik Azərbaycan”ın iki əməkdaşı və narkotik dövriyyəsi və kiberdələduzluq ittihamları ilə saxlanılan 8 nəfər rus vətəndaşının olduğu bildirilir.

İki ölkə arasında gərginlik artır

Rusiya və Azərbaycan arasında münasibətlərdə gərginlik iyunun 27-də Yekaterinburqda iki azərbaycanlının qətlə yetirilməsi ilə başlayıb. Həmin hadisədən sonra tərəflər qarşılıqlı şəkildə səfirlərini XİN-ə çağıraraq nota veriblər.

Eyni zamanda, Azərbaycanda “Sputnik Azərbaycan” media orqanının əməkdaşlarına qarşı cinayət işi açılıb, iki jurnalist həbs edilib. İyulun 1-də isə 8 Rusiya vətəndaşı narkotik maddələrin dövriyyəsi və kiberdələduzluq ittihamı ilə saxlanılıb. Səbail Rayon Məhkəməsi onların barəsində 4 aylıq həbs qətimkan tədbiri seçib.

Hökumətyönlü mediada yayılan görüntülərdə rus vətəndaşlarının xüsusi təyinatlı polis əməkdaşları tərəfindən sərt şəkildə saxlanılması, üzlərində zorakılıq izləri, geyimlərində isə qan ləkələri müşahidə olunub.

Azərbaycan XİN Rusiyaya etiraz etdi

İyulun 2-də Rusiya səfiri Mixail Yevdokimov Azərbaycan Xarici İşlər Nazirliyinə çağırılıb. Nazirliyin yaydığı məlumata görə, görüş zamanı nazir müavini Araz Əzimov Rusiya tərəfinə “iki ölkə arasında münasibətlərə xələl gətirən qeyri-dost addımlarla” bağlı Azərbaycanın narazılığını çatdırıb.

Hazırkı vəziyyət fonunda iki ölkə arasında münasibətlərin gərginləşməsi davam edir.