Bu gün Yekaterinburqda yerləşən Azərbaycan diaspor təşkilatının rəhbəri Şahin Şıxlinski hüquq-mühafizə orqanları tərəfindən saxlanılıb. Məlumata görə, hadisə bu gün yerli vaxtla təxminən 30 dəqiqə əvvəl baş verib.

Saxlanılma zamanı hüquq-mühafizə əməkdaşlarının Şıxlinskiyə qarşı kobud fiziki güc tətbiq etdiyi bildirilir. Göz şahidlərinin sözlərinə görə, o, yerə yıxılaraq sürüklənib və döyülüb. Hələlik Rusiya tərəfi bu hadisə ilə bağlı rəsmi açıqlama verməyib.

Hadisə iki ölkə – Rusiya və Azərbaycan arasında münasibətlərin son zamanlar gərginləşdiyi dövrə təsadüf edir. Ekspertlər bu cür halların artmasının dövlətlərarası münasibətlərin soyumasına işarə etdiyini bildirirlər. Bəzi müşahidəçilər bu insidenti Rusiya daxilində Azərbaycan əsilli şəxslərə qarşı yönəlmiş qərəzli münasibətin növbəti təzahürü kimi qiymətləndirir.

Azərbaycanın Rusiyadakı səfirliyindən hələlik məsələ ilə bağlı rəsmi mövqe açıqlanmayıb. Diaspor təşkilatları isə Şahin Şıxlinskinin azad olunması və ona qarşı zorakılıq hallarının araşdırılması tələbi ilə çıxış etməyə hazırlaşırlar.

Hadisə ilə bağlı əlavə məlumatlar gəldikcə xəbər yenilənəcək.