Notada deyilir ki, Mərkəz yerli qanunvericiliyə əsasən, hüquqi şəxs kimi qeydiyyatdan keçməlidir

Azərbaycan Xarici İşlər Nazirliyinin (XİN) Rusiya İnformasiya və Mədəniyyət Mərkəzinin (Rus Evi) Bakıda qeydiyyata alınması tələbi ilə Rusiya XİN-ə rəsmi bildiriş göndərdiyi bildirilir

Bu barədə Rusiya İnformasiya və Mədəniyyət Mərkəzinin Yevgeni Primakov “Rossiya 24” telekanalının efirində bildirib.

“Notada deyilir ki, bizim nümayəndəliyimiz, Rusiya İnformasiya və Mədəniyyət Mərkəzi yerli qanunvericiliyə əsasən, hüquqi şəxs kimi qeydiyyatdan keçməlidir”.

Onun sözlərinə görə, bu tələb “Rus Evi”nin hüquqi qeydiyyatının olmaması ilə əlaqədardır. Primakovun sözlərinə görə, Bakı Moskvanın Azərbaycanda “Rus Evi”nin qeydiyyatı ilə bağlı müraciətlərinə cavab verməyib:

“Rusiyanın Azərbaycandakı səfirliyi, nümayəndəliyimiz və Xarici İşlər Nazirliyi bu illər ərzində dəfələrlə Azərbaycanın Ədliyyə Nazirliyinə, Xarici İşlər Nazirliyinə qeydiyyata köməklik göstərilməsi xahişi ilə müraciət edib. Biz buna hər zaman hazır olmuşuq, lakin zənglərimiz cavabsız qalıb”.

Primakovun sözlərinə görə, Bakıdakı “Rus Evi” icarəyə götürdüyü binanı ay yarım ərzində boşaltmalıdır.

“Çünki sahibi binanı təcili satmaq niyyətində olduğunu deyib”, – Primakov əlavə edib.

Azərbaycan XİN məsələ ilə bağlı açıqlama verməyib.

Rusiya Federasiyası humanitar əlaqələr üzrə Dövlət Agentliyi (“Rossotrudniçestvo”) Rusiyanın aparıcı agentliyidir.

Agentliyin saytında deyilir ki, əsas missiyası Rusiyanın dünyada humanitar təsirini gücləndirmək olan təşkilat dünyanın 71 ölkəsində 87 xarici nümayəndəlik ilə təmsil olunub.

Rusiya Federasiyası humanitar əlaqələr üzrə Dövlət Agentliyi 2021-ci ildən “Rus Evi” qeyri-rəsmi adını alıb.

2025-ci il yanvarın 24-də hakimiyyətyönlü “Baku TV” peyk telekanalında Bakıdakı “Rus Evi” ilə bağlı reportaj verilib.

“Rus Evi, yoxsa daha çox rus kəşfiyyatı evi” adlı süjetdə bu qurumun fəaliyyəti ilə bağlı bir sıra iddialar səsləndirilib.

Reportajdan bir neçə gün sonra, yanvarın 27-də Azərbaycanın Rusiyadakı səfiri Rəhman Mustafayev bu ölkənin Xarici İşlər Nazirliyinə (XİN) çağırılıb.

Görüş zamanı Rusiyanın xarici işlər nazirinin müavini Mixail Qaluzin Rəhman Mustafayevə Azərbaycan mətbuatında son vaxtlar Rusiya əleyhinə olan silsilə yazılar, eləcə də Bakıda “Rus Evi”nə qarşı aparılan dezinformasiya kampaniyası ilə bağlı təəccüb ifadə edib.

Bir gün sonra isə, yanvarın 28-də Rusiyanın Azərbaycandakı səfiri Mixail Yevdokimov Xarici İşlər Nazirliyinə dəvət olunub. Azərbaycan Xarici İşlər Nazirliyinin məlumatına görə, görüş zamanı, Rusiya mətbuatında, eləcə də Rusiyanın bəzi rəsmi dairələri tərəfindən dezinformasiya xarakterli və Azərbaycanı hədəf alan yazıların dərc olunması və reportajların yayımlanmasının anlaşılmazlıq yaratdığı, bunun Azərbaycan və Rusiya arasında Müttəfiqlik qarşılıqlı fəaliyyəti haqqında Bəyannamənin məzmun və ruhuna zidd olduğu diqqətə çatdırılıb.

Yanvarın 29-da “Rus Evi”nin rəhbəri Yevgeni Primakov “Telegram” kanalında “Baku TV”-ni məhkəmə ilə hədələyib.