İyulun 14-də Bakı Ağır Cinayətlər Məhkəməsində “Toplum TV işi” üzrə növbəti məhkəmə iclası keçirilib. Prosesə hakim Azər Tağıyev sədrlik edib.

Demokratik Təşəbbüslər İnstitutunun (İDİ) rəhbəri Akif Qurbanov əvvəlki iclasda başladığı müdafiə çıxışına davam edib. Qaçaqmalçılıq və vergidən yayınma ittihamlarına cavab verən Qurbanov bildirib ki, təşkilatın Azərbaycanda qeydiyyatdan keçməsi və vergi ödəyicisi kimi fəaliyyət göstərməsinə süni əngəllər yaradılıb. Bu səbəbdən İDİ Gürcüstanda qeydiyyata alınıb.

O, həmçinin “Faktyoxla” platformasının yaradılmasından bəhs edərək, bu layihənin Azərbaycanda fakt yoxlama sahəsində ilk olduğunu qeyd edib. Qurbanovun sözlərinə görə, daha sonra hökumət bu sahədə alternativ platformalar qurub. O, dövlət qurumlarından birinin ona əməkdaşlıq təklif etdiyini, lakin təklifi qəbul etmədiyini də açıqlayıb.

İclas zamanı təqsirləndirilən jurnalist Fərid İsmayılov səhhəti ilə əlaqədar növbəti proseslərdə iştirak etməməsi ilə bağlı vəsatət verib. Hakim Penitensiar Xidmətin onun məhkəməyə daha uyğun şəraitli avtomobillə gətirilməsi məsələsinə baxacağını bildirib.

İDİ əməkdaşı Əli Zeynal isə müdafiəçilər tərəfindən hazırlanan qeydlərin Penitensiar Xidmət əməkdaşları tərəfindən alındığını iddia edib və bu əmrin məhz məhkəmə tərəfindən verilib-verilmədiyini soruşub. Hakim belə bir tapşırıq vermədiyini deyərək məsələ ilə bağlı Penitensiar Xidmət rəhbərliyinə müraciət edilməsini tövsiyə edib.

Məhkəmə iyulun 24-də saat 10:00-da davam edəcək.

Qeyd edək ki, “Toplum TV işi” üzrə ümumilikdə 10 nəfərə qarşı cinayət işi açılıb. Həbs olunanlar arasında III Respublika Platformasının spikeri Akif Qurbanov, qurumun qurucularından Ruslan İzzətli, Toplum TV-nin həmtəsisçisi Ələsgər Məmmədli, videoredaktor Müşfiq Cabbar, jurnalist Fərid İsmayılov, İDİ əməkdaşları Əli Zeynal, İlkin Əmrahov və Ramil Babayev yer alır.

Jurnalist Elmir Abbasov barəsində polis nəzarəti, Toplum TV redaktoru Şahnaz Bəylərqızı barəsində isə əvvəlcə ev dustaqlığı, daha sonra isə polis nəzarətinə verilmə qətimkan tədbiri seçilib.

Başlanğıcda qaçaqmalçılıq ittihamı ilə saxlanılan bu şəxslərə sonradan daha ağır ittihamlar irəli sürülüb. Onlar ittihamları rədd edir və həbslərinin siyasi sifariş əsasında baş verdiyini bildirirlər.

Xatırladaq ki, 2023-cü ilin noyabrından etibarən Azərbaycanda təxminən 30 jurnalist və ictimai fəal qaçaqmalçılıq ittihamı ilə saxlanılıb. Rəsmilər isə heç kimin peşə və ya siyasi fəaliyyətinə görə təqib edilmədiyini, ölkədə bütün hüquq və azadlıqların qorunduğunu bildirirlər.