“Toplum TV işi” çərçivəsində həbs edilən III Respublika Platformasının spikeri Akif Qurbanov həbsdəki həmkarı, Demokratik Təşəbbüslər İnstitutunun əməkdaşı Ramil Babayevin 28-ci doğum günü münasibətilə təbrik məktubu ünvanlayıb.

Qurbanov doğum günü təbrikində Babayevin gənc yaşına baxmayaraq, xalqın azadlıq və ədalət arzularını daşıyan yetkin düşüncələrə sahib olduğunu bildirib: “Bu dəmir barmaqlıqlar, qalın divarlar sənin azadlığını əlindən ala bilər, amma inamını, səsini, haqqın tərəzisində ucalan vicdanını yox… Sən gəncsən – gənc, amma düşüncələrin qocaman bir xalqın yükünü daşıyacaq qədər yetkindir.”

Akif Qurbanov Ramil Babayevi yalnız bir məhbus yoldaşı kimi deyil, “dövrün şüurlu və işıqlı gənci” kimi gördüyünü qeyd edib. O, həmçinin vurğulayıb ki, bu mübarizənin tarixi yazılacaqsa, orada Ramil Babayevin adı vicdanla və qürurla çəkiləcək.

“Bu gün sənə nə hədiyyə edə bilərəm, Ramil? Dəmir barmaqlıqlar arxasından azadlıq vəd edə bilmərəm, amma sarsılmaz həmrəylik, inam, və sənin işıqlı yoluna inamımı verə bilərəm.”

Sonda Akif Qurbanov təbrikini belə tamamlayıb: “Bu gün azad deyilik, bəli. Amma haqlı olduğumuzu bilmək – bizə azadlıqdan daha böyük güc verir. Doğum günün mübarək, qardaşım. Bütün qaranlıqlara baxmayaraq, bir gün mütləq işıq doğacaq!”

Qeyd edək ki, Ramil Babayev 2023-cü ilin martında “Toplum TV işi” üzrə keçirilən əməliyyat zamanı saxlanılıb. O, ittihamları qəbul etmir və siyasi sifarişlə həbs edildiyini bildirir. Hazırda o, 28-ci doğum gününü həbsdə qeyd edir.