Azərbaycan hökuməti 2024-cü ilin mart ayından etibarən Avropa İnsan Hüquqları Məhkəməsinin (AİHM) ölkə ilə bağlı çıxardığı qərarların icrasını faktiki olaraq dayandırıb. Bu barədə hüquqşünas Fariz Namazlı məlumat verib.

Namazlı bildirib ki, AİHM-in qərarları ilə müəyyən edilmiş kompensasiyalar ödənilmir, həmçinin Ali Məhkəmənin Plenumu bu qərarlar əsasında işlərə yenidən baxmaqdan sistematik şəkildə imtina edir:
“Bu, təkcə texniki icradan yayınma deyil, Azərbaycanın beynəlxalq hüquqi öhdəliklərindən açıq şəkildə imtinasıdır”, – deyə vəkil vurğulayıb.

Vəkil əlavə edib ki, hökumət yalnız qərarların icrasını dayandırmaqla kifayətlənməyib, eyni zamanda AİHM-in kommunikasiya mərhələsində ünvanladığı suallara da cavab vermir. Onun sözlərinə görə, bir neçə iş üzrə təqdim olunan şərhlərə qarşı hökumət heç bir mövqe bildirməyib. Bu isə AİHM-in prosedurlarına qarşı “etinasız və hörmətsiz” yanaşma kimi qiymətləndirilməlidir.

2024-cü ildə AİHM Azərbaycana qarşı 39 şikayət üzrə qərar verib və bunlardan 38-də Avropa İnsan Hüquqları Konvensiyasının ən azı bir maddəsinin pozulduğu müəyyən edilib. AİHM, hüquqları ölkə daxilində təmin olunmayan vətəndaşlar üçün sonuncu hüquqi instansiya hesab olunur.

Azərbaycan Prezidenti İlham Əliyev isə 2025-ci il aprelin 9-da ADA Universitetində keçirilən forumda bəyan edib ki, ölkə bundan sonra Avropa Məhkəməsinin qərarlarını tanımayacaq. Prezidentin sözlərinə görə, əgər Azərbaycan nümayəndələri Avropa Şurası Parlament Assambleyasında (AŞPA) iştirak edə və AİHM hakimlərinin seçilməsində səs verə bilmirsə, həmin hakimlərin çıxardığı qərarlar da ölkə üçün hüquqi əhəmiyyət daşımayacaq:
“Biz səsvermə hüququndan məhrum olunmuşuq. O hakimlərə səs verməmişik, kim olduqlarını bilmirik”, – deyə o qeyd edib.

Xatırladaq ki, AŞPA 2024-cü il yanvarın 24-də Azərbaycanın Şuraya üzvlükdən irəli gələn öhdəlikləri yerinə yetirmədiyini əsas gətirərək Azərbaycan nümayəndə heyətinin etimadnaməsini qəbul etməyib. Səbəblər arasında ölkədə insan hüquqlarının pisləşən durumu, jurnalistlərin həbsi, növbədənkənar prezident seçkilərinə müşahidə missiyasının dəvət edilməməsi və Qarabağda aparılan hərbi əməliyyatlar göstərilib.