Azərbaycan Dövlət Neft Şirkəti (SOCAR) ilə Almaniyanın dövlətə məxsus enerji şirkəti SEFE arasında 10 illik qaz təchizatı müqaviləsi imzalanıb. Razılaşmaya əsasən, SOCAR Almaniyaya hər il tədricən 1,5 milyard kubmetrə qədər təbii qaz ixrac edəcək.

Bu barədə məlumatı “Azərtac” yayıb. SEFE-nin yaydığı mətbuat bəyanatında qeyd olunub ki, qaz tədarükünə bu il başlanılacaq.

SEFE-nin icraçı direktoru bildirib: “Bu tərəfdaşlıq Azərbaycan və Almaniya arasında möhkəm əlaqələrin sübutudur. Biz bu müqavilə ilə Avropaya yeni bir marşrutla böyük həcmdə qazın çatdırılmasına nail oluruq. Bu həm portfelimizin şaxələndirilməsinə, həm də müştərilərimizin təchizat təhlükəsizliyinə xidmət edir.”

SEFE Almaniyada 50 minə yaxın müştəriyə enerji təminatı ilə məşğul olan və dövlətə məxsus beynəlxalq enerji şirkətidir.

Geosiyasi fon və mübahisəli məqamlar

Avropa İttifaqı Rusiyanın 2022-ci ildə Ukraynaya hərbi müdaxiləsindən sonra enerji asılılığını azaltmaq məqsədilə Azərbaycanla əməkdaşlığı genişləndirib. Lakin bu istiqamətdəki addımlar tənqidlərə də səbəb olur.

Bəzi beynəlxalq müşahidəçilər iddia edirlər ki, Rusiya qazı Azərbaycan üzərindən “təkrar ixrac”la Avropaya çatdırılır, bu isə enerji təhlükəsizliyi və sanksiya rejiminin effektivliyi ilə bağlı suallar doğurur.

Eyni zamanda, Azərbaycanın insan hüquqları sahəsindəki vəziyyəti, media və siyasi fəallar üzərində artan təzyiqlər fonunda Avropa İttifaqının Bakı ilə sıx əməkdaşlığı ikili standartlar ittihamlarına yol açır.