Çin İkinci Dünya Müharibəsində qazanılan Qələbənin 80 illiyini Pekində hərbi paradla qeyd edib. Bu, ölkənin son 10 il ərzində təşkil etdiyi ilk Qələbə Günü paradı olub.

Tədbirdə ən müasir hərbi texnika – pilotsuz uçuş aparatları, hipersəs raketləri və nüvə başlığı daşımağa qadir silahlar nümayiş etdirilib. Parad zamanı Çin ilk dəfə nüvə zərbə “triadasını” – havadan, qurudan və dənizdən buraxıla bilən raketlərini ictimaiyyətə təqdim edib. Bunlara uzun mənzilli “Jinglei-1” hava raketi, sualtıdan buraxılan “Julang-3”, həmçinin “Dongfeng-31” və “Dongfeng-61” qitələrarası raketləri daxildir.

Bundan əlavə, ABŞ təyyarədaşıyıcılarının prototiplərinə qarşı sınaqdan keçirilən “Yingji-17”, “Yingji-19” və “Yingji-20” hipersəs raketləri də nümayiş olunub. Həmçinin sualtı və havada istifadə oluna bilən dronlar, eləcə də gəmi bazalı pilotsuz helikopterlər diqqət çəkib.

Çin lideri Si Cinpin Tiananmen meydanında 50 min tamaşaçı qarşısında çıxış edərək, dünyanı “sülh və müharibə, dialoq və qarşıdurma” arasında seçim qarşısında olduğunu vurğulayıb və Çin xalqının “tarixin doğru tərəfində dayandığını” bildirib.

Paradda 25-dən çox xarici lider iştirak edib. Ən diqqət çəkən qonaqlar Rusiya Prezidenti Vladimir Putin və Şimali Koreya lideri Kim Çen In olub. 66 ildən sonra ilk dəfə Şimali Koreya rəhbəri Çin hərbi paradında iştirak edib; sonuncu belə hadisə 1959-cu ildə Kim İl Sunqun Pekin səfərində baş vermişdi.

Tədbirə həmçinin Myanma hərbi rəhbəri Min Aunq Hlaynq, Azərbaycan Prezidenti İlham Əliyev, İran Prezidenti Məsud Pezeşkiyan, Pakistan Baş naziri Şahbaz Şərif, Monqolustan Prezidenti Uxnəə Xürelsux, Özbəkistan Prezidenti Şövkət Mirziyoyev və Belarus Prezidenti Aleksandr Lukaşenko da qatılıb.

Şanxay Əməkdaşlıq Təşkilatının üzv və tərəfdaş dövlətlərinin bu formada bir araya gəlməsi “Avtoritarlar klubu” kimi qiymətləndirilir. Əslində, təşkilat təhlükəsizlik yönümlü bir forumdan rejimlərin öz hakimiyyətlərini möhkəmləndirdiyi bir alətə çevrilib – çox vaxt demokratiya, mətbuat azadlığı, insan hüquqları və canlı vətəndaş cəmiyyətinin hesabına. Pekindəki parad bu mənzərəni bir daha təsdiqlədi: sülh ritorikasının arxasında hərbi güc və avtoritar sistemlərin nümayişkaranə həmrəyliyi üstünlük təşkil edir.

My Webpage