17.08.2022-ci il tarixində rəsmi dövlət xəbər agentliyi olan AZƏRTAC-ın Dövlət Statistika Komitəsinə İstinadən yaydığı xəbəri diqqətimi çəkdi. "Ötən yeddi ayda Azərbaycanı dünyanın 171 ölkəsindən 800 mindən çox şəxs ziyarət edib" başlıqlı bu xəbərdə ölkəmizə səfər edən əcnəbi vətəndaşlar barəsində məlumat öz əksini tapıb. https://azertag.az/xeber/2255987

Komitənin məlumatına əsasən: "Cari ilin yanvar-iyul aylarında Azərbaycana dünyanın 171 ölkəsindən 832 min və ya əvvəlki ilin müvafiq dövrü ilə müqayisədə 2,3 dəfə çox əcnəbi və vətəndaşlığı olmayan şəxs gəlib".

Ən maraqlısı isə xəbərin sonunda yazılan, "Ölkəmizə gələn əcnəbilər və vətəndaşlığı olmayan şəxslərin 62 faizi hava, 36,4 faizi dəmir yolu və avtomobil, 1,6 faizi isə dəniz nəqliyyatından istifadə edib" cümləsidir. Bəlkə Nazirlər Kabineti sərhədləri öz vətəndaşlarımızın üzünə bağlayıb ancaq TIR və yük qatarları ilə əcnəbi turistləri ölkəyə gətirir xəbərimiz yoxdur?

Utanmadan, həyasızcasına Dövlət Statistika Komitəsi bu xəbəri dövlət xəbər agentliyində yayımlayır.

Hamı bilir ki, 2020-ci il mart ayından etibarən pandemiya səbəbindən Azərbaycan bütün quru və hava sərhədini bağladı. O vaxtdan bu günə kimi quru və su sərhədləri bağlıdır.

Necə olur ki, ölkənin bütün quru və dəniz sərhədlərin bağlı olduğu bir zamanda təxminən 145160 vətəndaş ölkəyə girib? Bu xəbəri verərkən görəsən Dövlət Statistika Komitəsi həya etdimi? Utandımi?

Hansı ki, minlərlə vətəndaşımız vətənə gəlmək üçün Rusiya, Gürcüstan sərhədlərində qalıb. Bu cür yalnış xəbərləri yaymaqla heç olmasa əzilən, təhqir olunan xalqa hörmət edin. Onların hissləri ilə oynamayın!


Tərlan Novruzov