Xalqımızın mərdliyinə söz yox, ancaq fəlakət o qədər böyük ki, qardaş ölkəyə dövlət səviyyəsində daha böyük miqyaslı yardım təmin edilməlidir. 10 minlərlə, bəlkə də 100 minlərlə insan 40 saatdır ki, zəlzələnin uçurduğu 6 minə yaxın binanın dağıntıları altındadır. Uçqunlar altında hələ də sağ qalanlar soyuqda, sıxışmış durumda, yaralı vəziyyətdə dəhşətli işgəncə yaşayırlar. Daha 100 minlərlə, bəlkə də milyonlarla insan isə evsiz-eşiksiz, paltarsız, yeməksiz açıq, soyuq küçələrdə qalıb.

Bunları ona görə yazıram ki, Türkiyədəki dəhşətin miqyasını tam təsəvvür etməyə çalışaq. Qardaş ölkədə belə dəhşətli fəlakət yaşanarkən Azərbaycan dövlət olaraq daha çoxunu etməlidir. Sadə və yoxsul insanlar çalışırlar ki, əllərindən gələn qədər yardım toplasınlar. Xalqımızın xeyrxahlığı, qəlbinin genişliyi, mərdliyi növbəti dəfə təsdiq olunur. Ancaq miqyas tam başqadır. Azərbaycan dövlət olaraq bütün resurslarını səfərbər etməlidir.

Dövlətimizin gücü var ki, fəlakətə uğramış şəhərlərdən ən azı birinin ilk günlərdə bütün sosial problemini öz üzərinə götürsün. İnsanlara təcili qaydada xilasedici texnika və alətlər, çadırlar, generatorlar, isti geyim, yemək, tibbi ləvazimat və digər zəruri yardımlar çatdırılmalıdır. Dövlətdə bunların hamısının ehtiyatı var. Çox yox, 3 nəfər orta ranqlı məmurun mənimsədiyi qədər - məsələn, 500 milyon manat vəsait ayırmaqla zəlzələdən zərər çəkmiş bir neçə 100 min nəfər qardaş və bacımızı zəruru köməklə təmin etmək olar. Ləngimədən dövlət miqyaslı iş görülməlidir.