
Almaniyanın paytaxtı Berlində, Almaniya Xarici İşlər Nazirliyinin binası qarşısında Azərbaycanda həbsdə olan jurnalist və siyasi fəallara dəstək məqsədilə davamlı etiraz aksiyası keçirilir.
Aksiya noyabrın 16-da başlayıb və noyabrın 26-dək hər gün davam edəcək. Berlinin Werderscher Markt ərazisində keçirilən aksiyanın “Azərbaycandakı siyasi məhbuslara azadlıq” şüarı ilə qeydiyyata alındığı görünür. Almaniya Xarici İşlər Nazirliyinin Berlin qərargahı da məhz Werderscher Markt 1 ünvanında yerləşir.
Aksiyada iştirak edən azərbaycanlı mühacir Ravil Həsənov “Azad Söz”ə bildirib ki, tədbirin əsas məqsədi Azərbaycanda siyasi fəaliyyətinə, mövqeyinə və jurnalist fəaliyyətinə görə həbs olunduğu bildirilən şəxslərin azad edilməsinə diqqət çəkməkdir.
Onun sözlərinə görə, aksiya ərazisində etiraz çadırları qurulub, həbsdə olan şəxslərin fotoları və Azərbaycan hakimiyyətini tənqid edən plakatlar yerləşdirilib.
Ravil Həsənov bildirib ki, iştirakçılar bununla Almaniya ictimaiyyətinin və siyasi dairələrinin diqqətini Azərbaycandakı insan hüquqları vəziyyətinə yönəltməyə çalışırlar.
Berlin polisi məlumatları əsasında yayımlanan nümayiş reyestrlərində aksiyanın noyabrın 16-dan 26-dək davamlı oturaq etiraz formasında keçirilməsi göstərilir.
Aksiya iştirakçıları həbsdə olan jurnalistlərin, siyasi fəalların və digər məhbusların azadlığa buraxılmasını tələb edir, onların işlərinə beynəlxalq diqqətin artırılmasına çağırırlar.