Ermənistanda müxalifət lideri, milyarder iş adamı və “Taşir” şirkətlər qrupunun rəhbəri Samvel Karapetyan bir ay müddətinə həbs edilib.

Noyabrın 5-də Yerevan Antikorrupsiya Məhkəməsi Karapetyan barəsində həbs qətimkan tədbiri seçib. O, bundan bir gün əvvəl saxlanılmışdı. (Public Radio of Armenia⁠)

Ermənistan İstintaq Komitəsinin məlumatına görə, Karapetyan “Ermənistan Elektrik Şəbəkələri” şirkətinə 64,5 milyard dram (təxminən 170-180 milyon dollar) məbləğində ziyan vurulması ilə bağlı cinayət işi çərçivəsində ittiham olunur.

İstintaq materiallarına əsasən, iş üzrə ümumilikdə 36 nəfər barəsində cinayət təqibinə başlanılıb. Onlar özəl sektorda vəzifə səlahiyyətlərindən sui-istifadə, xüsusilə külli miqdarda əmlakın mənimsənilməsi və çirkli pulların yuyulmasında şübhəli bilinirlər. (Public Radio of Armenia⁠)

Şübhəlilər arasında “Ermənistan Elektrik Şəbəkələri”nin Direktorlar Şurasının üzvləri, şirkətin baş direktoru, onun müavini və digər vəzifəli şəxslər də var. Hüquq-mühafizə orqanları iş çərçivəsində 65 ünvanda axtarış aparıb. Karapetyanın və “Güclü Ermənistan” parlament fraksiyasının rəhbəri Narek Karapetyanın evlərində də axtarış keçirilib.

Həbsin siyasi səbəblərlə bağlı olduğu iddia edilir

“Güclü Ermənistan” partiyası Karapetyanın həbsini siyasi təzyiq kimi qiymətləndirir. Partiyanın iddiasına görə, təqib müxalifətin hökumətin hazırladığı yeni Konstitusiya layihəsinə qarşı mövqeyi ilə əlaqədardır.

Müxalifət layihəni “əliyevçi Konstitusiya” adlandırır və onun qəbuluna qarşı çıxacağını bəyan edir. Ermənistanın Baş naziri Nikol Paşinyan isə cinayət işinin siyasi motivlərlə əlaqələndirilməsi barədə iddiaları rədd edib. O, hüquq-mühafizə orqanlarının araşdırma aparmaq üçün əsaslarının olduğunu bildirib. (Armenpress⁠)

Qeyd edək ki, Samvel Karapetyan daha əvvəl də cinayət təqibinə məruz qalıb. O, hakimiyyətin zorla ələ keçirilməsinə və konstitusiya quruluşunun devrilməsinə açıq çağırışlarda ittiham olunub. Karapetyan həmin ittihamları siyasi motivli hesab edir.

Konstitusiya mübahisəsi və Azərbaycanla sülh prosesi

Ermənistanda yeni Konstitusiya layihəsi ətrafında müzakirələr Azərbaycanla münasibətlər fonunda da xüsusi əhəmiyyət daşıyır.

Azərbaycan Ermənistanla yekun sülh sazişinin imzalanması üçün ölkə Konstitusiyasının preambulasında 1990-cı il Müstəqillik Bəyannaməsinə edilən istinadın dəyişdirilməsini tələb edir. Bakı hesab edir ki, həmin sənəddə əksini tapan müddəalar Azərbaycana qarşı ərazi iddiaları ilə bağlıdır.

Beləliklə, Samvel Karapetyanın həbsi Ermənistanda daxili siyasi qarşıdurmanın və yeni Konstitusiya ətrafında mübahisələrin kəskinləşdiyi bir vaxta təsadüf edir.

İstintaq davam edir. Karapetyanın təqsiri məhkəmənin qanuni qüvvəyə minmiş hökmü ilə təsdiqlənməyib.