İranın Ali Rəhbərinin beynəlxalq məsələlər üzrə müşaviri Əli Əkbər Vilayəti Ermənistanın “Tramp marşrutu” (TRIPP) layihəsini dəstəkləməsinə sərt reaksiya verərək rəsmi İrəvana xəbərdarlıq edib. O, Tehranın Cənubi Qafqazda təhlükəsizlik məsələsində öz mövqeyindən geri çəkilməyəcəyini bəyan edib.

Vilayəti bu barədə “İttilaat” qəzetində dərc olunan “Ermənistan Baş nazirinə açıq və səmimi müraciət” başlıqlı məqaləsində yazıb.

İran rəsmisi Ermənistan parlamentində TRIPP layihəsinin təsdiqlənməsini tənqid edərək, bunu Baş nazir Nikol Paşinyanın uğursuz siyasətinin nəticəsi və Ermənistan xalqının maraqlarına zidd addım kimi qiymətləndirib.

Vilayətinin sözlərinə görə, İran Rusiyanın iştirakı olub-olmamasından asılı olmayaraq, Cənubi Qafqazın təhlükəsizliyinin qorunmasını öz məsuliyyəti hesab edir.

O, Ermənistan hakimiyyətini Azərbaycanla münasibətlərdə düşmənçiliyi dərinləşdirməkdə, həmçinin region ölkələri ilə əlaqələrdə qeyri-sabit siyasət yürütməkdə ittiham edib.

İranlı müşavir Tehranın Zəngəzur dəhlizinin yaradılmasına qarşı mövqeyinin dəyişmədiyini də vurğulayıb. O, beş il əvvəl Tehranda keçirilən görüşlərdə İranın keçmiş Ali Rəhbərinin Türkiyə Prezidenti Rəcəb Tayyib Ərdoğan və Rusiya Prezidenti Vladimir Putinlə bu məsələdə ortaq mövqeyini xatırladıb.

Vilayəti Ermənistanın Moskvanın Ukraynadakı müharibəyə görə Cənubi Qafqaza diqqətini azaldacağını düşünməsinin yanlış hesab olduğunu bildirib. O, bu barədə Ermənistan xarici işlər nazirinin müavini və Tehrandakı Ermənistan səfiri ilə görüşlərində də danışdığını qeyd edib.

İran rəsmisinin məqaləsindəki ən sərt ifadə isə Ermənistanın Tehrandakı səfirinə ünvanladığı xəbərdarlıqla bağlı olub.

“Son sözümü Ermənistanın səfirinə də dedim: Tramp və müttəfiqləri İranın bu ‘qırmızı xətti’ni keçmək istəsələr, onların ayaqlarını qıracağıq”, – deyə Vilayəti səfirə söylədiyi sözləri açıqlayıb.

O, Ermənistan hökumətinin ABŞ, Fransa və Böyük Britaniyanın siyasətinə getdikcə daha çox yaxınlaşmasını da tənqid edib. Vilayətinin fikrincə, bu siyasət Cənubi Qafqazda gərginliyin artmasına və regional təhlükəsizliyin pozulmasına səbəb ola bilər.