Prezident İlham Əliyev “Daşınmaz Əmlakın Elektron Reyestri və Kadastrı” informasiya sisteminin – DERKİS-in yaradılması və fəaliyyətinin tənzimlənməsi ilə bağlı fərman imzalayıb.

Fərmana əsasən, yeni sistem daşınmaz əmlakın reyestri və kadastrı ilə bağlı məlumatların vahid elektron platformada toplanmasını və idarə olunmasını təmin edəcək.

DERKİS-in sahibi funksiyalarını İqtisadiyyat Nazirliyi yanında Əmlak Məsələləri Dövlət Xidməti həyata keçirəcək. Sistemin operatoru isə Dövlət Xidmətinin tabeliyindəki Daşınmaz Əmlakın Dövlət Kadastrı və Reyestri olacaq.

İqtisadiyyat Nazirliyinə sistemin formalaşdırılması, aparılması, fəaliyyətinin təşkili və inkişaf etdirilməsi üçün zəruri tədbirlər görmək tapşırılıb.

Fərmana görə, nazirlik 18 ay ərzində öz strukturuna daxil olan və tabeliyində fəaliyyət göstərən qurumların informasiya ehtiyatlarında saxlanılan daşınmaz əmlakla bağlı sənəd və məlumatların DERKİS-ə daxil edilməsini təmin etməlidir.

Eyni zamanda, hazırda Torpaqların Elektron Kadastr Uçotu İnformasiya Sistemində olan məlumatlar yeni sistemə köçürüləcək. Məlumatların miqrasiyası başa çatdıqdan sonra əvvəlki elektron kadastr sisteminin fəaliyyətinin dayandırılması nəzərdə tutulur.

DERKİS-in “Hökumət buludu”nda – G-cloud platformasında yerləşdirilməsi də planlaşdırılır. Bununla bağlı İqtisadiyyat Nazirliyi Rəqəmsal İnkişaf və Nəqliyyat Nazirliyi ilə birgə müvafiq tədbirlər həyata keçirəcək.

Yeni sistem, həmçinin “Dövlət informasiya ehtiyatlarının, sistemlərinin və elektron xidmətlərin vahid reyestri”nə və fərdi məlumatların informasiya sistemlərinin dövlət reyestrinə daxil ediləcək.

Rəqəmsal İnkişaf və Nəqliyyat Nazirliyinə isə digər dövlət qurumlarında saxlanılan daşınmaz əmlakla bağlı sənəd və məlumatların 18 ay ərzində Elektron Hökumət İnformasiya Sistemi vasitəsilə DERKİS-ə ötürülməsi üçün tədbirlər görmək tapşırılıb.

Nazirlik Xüsusi Rabitə və İnformasiya Təhlükəsizliyi Dövlət Xidməti ilə birlikdə sistemin informasiya təhlükəsizliyinin və dövlət informasiya ehtiyatları ilə inteqrasiyasının təmin olunması istiqamətində də iş aparacaq.

Nazirlər Kabinetinə fərmandan irəli gələn digər məsələlərin həlli tapşırılıb.

Yeni sistemin tətbiqi ilə daşınmaz əmlakın reyestri, torpaq kadastrı və bu sahədə müxtəlif dövlət qurumlarında saxlanılan məlumatların vahid rəqəmsal bazada birləşdirilməsi nəzərdə tutulur.