Hakimiyyəti yüngülcə tənqid etdiyinə görə millət vəkili Vahid Əhmədovun linc edilməsi Azərbaycan adına utanc gətirir. Nə edib Vahid Əhmədov? Hansı sözü yalandır? Hansı hüquqi və etik normaları pozub ki, onun müsahibəsini Milli Məclisdə müzakirə edirsiz? Vahid Əhmədov ölkədəki acı həqiqətlərin heç daha sərtlərini dilə gətirməyib. Vahid Əhmədov bəzi həqiqətləri dilə gətirib, bəzi tənqidləri səsləndirsə də əslində hakimiyyəti müdafiə edib. Ancaq balta ilə işləməyə alışmışlar, Vahid bəyin iqtidarı səviyyəli, incə dəstəyini anlamayıblar.
Mehman Hüseynova verdiyi müsahibədə səsləndirdiyi korrekt və yüngül tənqidə görə Vahid Əhmədovun məsələsinin Milli Məclisin İntizam Komissiyasına çıxarılması ölkəmizi bütün dünyada rüsvay edəcək.
Xeyli müddətdir ki, Azərbaycan hakimiyyəti beynəlxalq hesabatlarda avtoritar, klassik avtoritar, ailə hakimiyyəti, kleptokratiya kimi təsvir olunur. Ancaq hazırda baş verənlər Azərbaycan hakimiyyətinin daha dibə yuvarlandığını göstərir.
Prinspial müxalifətin parlamentə buraxılmadığı ölkədə iqtidarı müdafiə edən bitərəf millət vəkili yüngülcə tənqidinə görə parlamentin İntizam Komissiyası qarşısına çıxarılırsa, bu artıq ölkədə hər şeyə total nəzarətin, totolitarizmin bərqərar edilməsinə başlanılmasından xəbər verir.
Artıq heç müxalifətin bəyanatlarına, beynəlxalq təşkilatların hesabatlarına da ehtiyac qalmır.
Azərbaycandakı rejim bu hərəkətilə ölkədə insan hüquqları və azadlıqlarının hansı acınacaqlı vəziyyətdə olduğunu özü bütün dünyaya sübut etmiş olacaq.
Ermənistanın və erməni diasporasının anti - Azərbaycan təbliğatına bundan gözəl ötürmə ola bilərmi? Bircə təsəvvür etməyə çalışın ki, onlar öz təbliğatlarında rejimin bu iyrənc tamaşasından ölkəmizə qarşı necə istifadə edəcəklər. Bu absurd, anti - demokratik hadisədən
ermənilərin ölkəmizə qarşı istifadəsini də qoyaq bir kənara. Bu ölkə bizim Vətəndir axı. Görmürsünüz, Vətəni nə günə qoyurlar? Nə vaxta qədər dövlətimizi, millətimizi səviyyəsiz, təsadüfi adamların yeyib bitirməsinə özümüzü görməməzliyə vuracağıq?
Əli Kərimli.