Müğənni Rəqsanə İsmayılovanın həyəcanlı şəkildə etdiyi videomüraciətə baxdım.

O, balaları ilə birlikdə əlindən alınmış evinin qarşısında özünü yandıracağını, alovlu intihara imza atacağını söyləyir.
Niyə?

Demək, Xəzər Rayon Polis İdarəsinin rəisi, polis polkovniki Əli İbrahimov bir neçə şəxsə, eləcə də müğənni Rəqsanə İsmayılovaya faizlə pul verib, evlərini isə öz adına keçirib.

Müğənni iddia edir ki, sələmçi rəisin borcu tam ödənilməsinə baxmayaraq, evi qaytarılmır. Analoji məzmunlu başqa şikayətlər də var.

İsmayılova göstərir ki, Bakı Şəhər Baş Polis İdarəsində araşdırma aparılıb, sələmçi rəislə üzləşdirilib.

Müğənni əlində sübut və dəlillərin olduğunu önə çəkir. Belə çətin vəziyyətdə pozulmuş mülkiyyət hüquqlarının bərpası üçün prezidentə, 1-ci vitse-prezidentə, daxili işlər nazirinə müraciət edir, kömək istəyir.

Kütləvi şikayətlərdən, problemin ictimailəşdirilməsindən sonra çox güman ki, iddia olunduğu kimi, sələmçi rəis tutduğu postdan azad ediləcək.
Lakin araşdırmanın tam, hərtərəfli və obyektiv aparılacağına, vəzifəli şəxsin hərəkətlərinə ədalətli hüquqi qiymət veriləcəyinə, adekvat məsuliyyət tədbirinin seçiləcəyinə şübhə ilə yanaşıram, çünki Azərbaycan gerçəkliyinə bələdəm.

Bir halda ki, respublikanın əməliyyat-axtarış, təhqiqat, istintaq orqanlarının fəaliyyətində qanunların eyni cür və dürüst icra olunmasına nəzarət edən prokurorluq orqanlarının başında Kamran Əliyev kimi siyasi rejimin “hüquqi köləsi” mövcuddur…

Ümumiyyətlə isə cəmiyyət və dövlət olaraq yaman gündə olduğumuzu söyləyirəm, videomüraciəti də rəy bölməsində yerləşdirirəm ki, baxmayanlar baxsın.