Azərbaycan hakimiyyəti sayı 300 nəfərə yaxınlaşan siyasi məhbusları Ermənistan hakimiyyətinin Köçəryanı həbs etməsinə cavab olaraq həbs edibmiş?

Təəccüblənməyə tələsməyin. Prezidentin Mətbuat Xidməti adından yayılan açıqlamadan məhz belə nəticə çıxır.

Bilirsiz ki, ABŞ Dövlət katibi Blinkenin İlham Əliyevlə telefon danışığından sonra Azərbaycan hakimiyyətinin yaydığı açıqlamada Antoni Blinkenin İlham Əliyevlə siyasi məhbus mövzusunu da müzakirə etdiyi heç qeyd edilməmişdi. Ancaq Azərbaycan tərəfinin rəsmi açıqlamasından sonra ABŞ Dövlət departamenti də telefon danışığı haqda məlumat yaydı. Həmin məlumatda Dövlət katibinin Azərbaycanda insan hüquqlarının vəziyyətini də İlham Əliyevlə müzakirə etdiyi vurğulanırdı. Məlumatda deyilirdi:
“Antoni Blinken Azərbaycanın insan hüquqları və təməl azadlıqlarla bağlı beynəlxalq öhdəliklərinə əməl etməsinin vacibliyini bir daha vurğulayıb və əsassız həbs edilənlərin azad edilməsinə çağırıb”.

Görünür Əliyev rejimi bu açıqlamadan pərt olub və təcili qaydada Azərtacın Prezidentin mətbuat xidmətilə müsahibəsi təşkil olunub və yayılıb. Müsahibədə Prezidentin mətbuat xidməti etiraf edib ki, telefon danışığı zamanı həqiqətən də Azərbaycanda insan hüquqlarının vəziyyəti müzakirə olunub. Mətbuat xidmətinin açıqlamasından məlum olub ki, Blinkenin "əsassız həbs edilənlərin azad edilməsi" çağırışına İlham Əliyev belə cavab verib: "Bu xüsusda dövlətimizin başçısı Dövlət katibi Antoni Blinkenə Ermənistanda müxalifət nümayəndələrinin həbsi, hətta həbs müddətində ölüm hallarının olması, insan hüquqlarının pozulması hallarını xatırladıb və bu konteksdə Qərb ölkələrinin səssizliyinin başadüşülən olmadığını, bu kimi faktların məhz ikili standartların bariz nümunəsi olduğunu qeyd edib."

Hazırda Ermənistanda siyasi məhbusların olduğu dünyaya məlum deyil. Tam əksinə, Ermənistan müxalifətinin parlamentdə təmsil olunduğu, istədiyi vaxt İrəvanın mərkəzi meydanlarında mitinq etdiyi, hətta ya işə, ya da xarici səfərlərə gedərkən Paşinyanın yolunu vaxtaşırı kəsdiyi də hamının bildiyi həqiqətlərdir.

O da məlumdur ki, bir neçə il öncə Ermənistanda Xocalı qatili Köçəryan həbs olunmuşdu. O vaxtlar da İlham Əliyev bir neçə dəfə Köçəryanı nəzərdə tutaraq Ermənistanda siyasi məhbuslardan danışmışdı. Ancaq bir neçə aydan sonra Köçəryan da həbsdən azad edildi və indi İlham Əliyevin əlində belə bir arqument qalmayıb.
Lap tutaq ki, Köçəryan hələ də həbsdədir. Bundan bizə nə? Köçəryan həbs olunub deyə, Qarabağ qəhrəmanı Tofiq Yaqublu da şərlənib həbs olunmalıdır? Köçəryan həbs olunub deyə, Qubad İbadoğlu, Sevinc Vaqifqızı, Ələsgər Məmmədli, Nazim Bəydəmirli, Akif Qurbanov, Ülvi Həsənli, Bəxtiyar Hacıyev, Niyaməddin Əhmədov, Əlizamin Salayev, Elxan Əliyev, Sahib Məmmədzadə və cəmi 289 nəfər azərbaycanlı ictimai - siyasi fəal və jurnalistlər də həbs olunmalıdır? Bu necə məntiqdir?

Bir dövlət başçısı öz xalqının say - seçmə övladlarının şərlənib həbs edilməsinə necə dünyanın harasındasa olmuş (?) haqsızlıqla bəraət qazandıra bilər? Ümumiyyətlə, siz Prezidentin mətbuat xidmətinin adından yayılmış və rejimin mövqeyini ifadə edən bu açıqlamada hansısa məntiq gördünüzmü?