İsa Qəmbərin intervüsünə Tofiq Yaqublu həbsdən nə cavab verdi?

"Bu gün ata ilə görüşdük. Əhval-ruhiyyəsi yaxşıdır. Səhhətindəki problemlər qabarmasa da, xeyli çəki itirib. Möhkəmdir. Ölkədə və dünyada, xüsusən də, Rusiya-Ukrayna cəbhəsində baş verənlər, diplomatik korpusla görüşlər barədə söhbət etdik. ABŞ-ın və Qərbin dəstəyi ilə Ukraynanın qalib gələcəyinə inanır.

Görüş zamanı ölkədə baş verənlər barədə də söhbət etdik. İsa bəyin BBC-yə verdiyi müsahibə zamanı səsləndirdiyi bəzi məsələləri dəqiqləşdirmək üçün atadan soruşdum. Söhbət 28 May tədbirində Müsavatla AXCP-nin birgə iştirak etməməsi məsələsindən gedir.

Hörmətli İsa bəy müsahibədə vurğulayır ki, o vaxt (2016-ci il) Tofiq Yaqublunun vasitəçiliyi ilə AXCP-yə tədbirdə birgə iştirakla bağlı təklif etdik. Ancaq AXCP bu təklifi qəbul etmədi.

Ancaq İsa bəy müsahibədə o vaxt tədbirdə birgə iştirakla bağlı AXCP-yə ünvanlanan təklifin detallarını demədi. AXCP-nin Müsavatla tədbirdə niyə birgə iştirak etmədiyinə açıqlama gətirmədi.

Tofiq Yaqublu bu danışıqlarda vasitəçi olub və detalları deyir:

“Mən ovaxtkı həbsimdən təzə çıxmışdım. Müxalifətin bir araya gəlməsini çox istəyirdim. Bunun üçün də xeyli cəhdlər etdim. 28 May tədbirinə 3-4 gün qalmış Müsavat Partiyasının ovaxtkı başqanı Arif Hacılı bildirdi ki, biz AXCP ilə tədbirdə o şərtlə iştirak edərik ki, AXCP Milli Şura ilə tədbirə getməsin. “Biz Milli Şura adlı qurum tanımırıq!”

Bu məsələni mən AXCP sədri Əli Kərimliyə dedim. O, isə bildirdi ki, mən necə MŞ-ya, əqidə yoldaşlarıma deyim ki, mən sizlə tədbirə getmirəm?

Xatırladım ki, o vaxt hər iki partiya arasında münasibətlər çox gərgin idi. Partiya üzvləri bir-birilərini tənqid, hətta təhqir edirdilər. Belə bir gərgin atmosferdə Əli bəy Milli Şuraya arxa çevirib Müsavatla birgə tədbirə getməyin doğru qərar olmadığını dedi.

Əli Kərimli: “Əgər Müsavat Partiyası elə bir şərt qoymasaydı, AXCP o tədbirdə birgə iştirak edəcəkdi”.
Mən dəfələrlə Divanda, sədrlər şurasında AXCP niyə o tədbirdə birgə iştirak etmədiyinin səbəbini izah etmişəm”.

Məlumatı Nigar Həzi paylaşıb