Məlum olduğu kimi, AXCP sədri Əli Kərimlinin barəsində xüsusi ittiham qaydasında məhkəməyə şikayət verilib.

Şəksiz ki, formal olaraq şikayətçi Aydın Əliyev adlı şəxs olsa da, real mənada xüsusi ittihamçının dövlət başçısı İlham Əliyev olduğu sirr deyil.

Əli Kərimlinin 13 avqustda təqsirləndirilən şəxs qismində cəlb ediləcəyi, hətta yekunda ədalətsiz ittiham hökmü əsasında azadlıqdan məhrum olunacağı da gözlənilir.

Əlbəttə, 35 ildir ki, siyasətdə olan Əli Kərimlinin hansısa şifahi, ya da yazılı nitqində kimsənin şərəfini ləkələyən, ləyaqətini alçaldan söz, fikir, ifadə tapmaq mümkün deyil, çünki olmayıb. Tənqid, ya da sərt tənqid olub ki, bu da qanunauyğundur.

Eyni zamanda, əmin olaq, Əli Kərimli cinayət təqibinə məruz qalıb, qanunsuz əsaslarla cəmiyyətdən təcrid olunacaqsa, bu, təkcə onun özünün və sədri olduğu Azərbaycan Xalq Cəbhəsinin məhrumiyyəti olmayacaq. Onsuz da ağır ziyanlar çəkmiş vətəndaş cəmiyyətinə, şiddətlənən repressiv siyasətin fonunda sıraları xeyli seyrəlmiş tənqidçi çevrələrə, ümumiyyətlə, qaynağını cəmiyyətdən götürən idarəçilk uğrunda mübarizə aparan dairələrə böyük zərbə olacaq.

Çünki hazırda avtoritar idarəetmədən diktaturaya doğru sürətlə irəliləyən hakimiyyətin önündə əsas mübarizə mərkəzi Azərbaycan Xalq Cəbhəsi Partiyası və onun sədri Əli Kərimlidir. Bunu danmaq ədalətsizlik, bir o qədər də insafsızlıq olardı.
Aşkardır ki, partiya və sədr son dərəcə qeyri-bərabər şərtlər altında mücadilə verməkdədir.

Belə ki, hakimiyyət Kərimliyə qarşı ağla gələn və gəlməyən qanunazidd davranışlar sərgiləməkdədir. Qərargahdan çıxardılar.

Yeni qərargahda mənzillənən AXCP-nin siyasi faəliyyətinə çox dözmədilər. Kirayəyə götürülmüş əmlakı partlatdılar.
Uzun illərdir ki, partiya ofissiz fəaliyyət göstərir.

Əli Kərimlinin ölkə xaricinə səfərlərini əngəlləmək üçün ümumvətəndaşlıq pasportunu da verməkdən imtina edirlər.
Bütün bunlar azlıq edirmiş kimi, 4 ildir ki, internetini də məhdudlaşdırıblar.

Qeyd edilənlərdən bu nəticə çıxarılır:
Əlbəttə, bu gün hökumət çox güclüdür. YAP və İlham Əliyev idarəçiliyi üçün ölkənin daxilindən ciddi narahatçılıq görmürəm.

Amma bu, necə mümkün olub? Təbii, sərbəst rəqabət, azad seçkilər əsasında yox, siyasi haqq və azadlıqların tam məhdudlaşdırlması, vətəndaşların dövlətin idarə olunmasında iştirak hüququnun tanınmaması, siyasətin və medianın icazəli hala gətirilməsi, sivil sektorun təmsilçilərinin, ictimai rəy liderlərinin Kürdəxanıdakı təcridxanaya köçürülməsi şəraitində mümkün olub.

Bu mənada hakimiyyət müxalifəti və rəhbərini saxtakarlığa, ələlxüsus da zorakı üsullara istinad edərək udmaqdadır.
Hökumət və zirvəsi heç zaman sivil və hüquqi müstəvidə mübarizə aparmadı, təəssüf ki.

Xeyli çətinləşmiş dövrdə siyasi mübarizəsini davam etdirən, haqları pozulan, repressiyaya məruz qalan insanların problemlərini hər zaman diqqətdə saxlayan, hökumətin hücumlarına tuş gələn siyasi xadimlərin, ictimai fəalların, hüquq müdafiəçilərinin, media mənsublarının və s. müdafiəsində olan AXCP sədri Əli Kərimlinin hüquqlarının müdafiəsinə qoşulmaq günün tələbidir, mühüm şərtdir.
Odur ki, demokratlar 13 avqust 2024-cü il tarixdə, saat 11-00-da Nəsimi Rayon Məhkəmsində Əli Kərimli ilə bərabər olmalı, dəstək verməlidirlər.