Bu gün Fransanın Strasburq şəhərində Avropa Şurası Parlament Assambleyasının (AŞPA) plenar sessiyası çərçivəsində Ermənistanın xarici işlər naziri Ararat Mirzoyan çıxış edib. O, çıxışında Azərbaycan və Ermənistan arasında sülh prosesinin mövcud durumu, eləcə də gələcək perspektivlər, regional sabitliyin təmin olunması və ticarət əlaqələrinin inkişafı mövzularına toxunub.

Mirzoyan bildirib ki, Cənubi Qafqazda davamlı sülhün bərqərar olması üçün dialoqun və qarşılıqlı etimadın gücləndirilməsi vacibdir. Onun sözlərinə görə, sülh sazişinin imzalanması regionda iqtisadi əməkdaşlıq, nəqliyyat və ticarət əlaqələrinin genişlənməsi üçün yeni imkanlar aça bilər. Ermənistan rəsmisi vurğulayıb ki, rəsmi İrəvan bu istiqamətdə beynəlxalq tərəfdaşlarla, o cümlədən Avropa qurumları ilə əməkdaşlığa önəm verir.

Avropada yaşayan bir qrup separatçı erməninin Strasburqda Avropa Şurası Parlament Assambleyasının (AŞPA) binası qarşısında Ermənistanın Baş naziri Nikol Paşinyanın siyasətinə qarşı keçirdiyi etiraz aksiyası ilə bağlı Ermənistanın xarici işlər naziri Ararat Mirzoyandan münasibət almaq mümkün olmayıb.

Aksiya ilə bağlı Mirzoyanın mövqeyini öyrənmək istəsək də, Ermənistan XİN rəhbəri məsələni şərh etməkdən imtina edib. Rəsmi dairələr tərəfindən etirazda səsləndirilən tələblər və ittihamlarla bağlı hələlik hər hansı açıqlama verilməyib.

Qeyd edək ki, etirazçılar Ermənistan daxilində həbs olunan keşişlərin, eləcə də Azərbaycanda saxlanılan terrorçuların azad edilməsini tələb ediblər. Aksiya təhlükəsizlik tədbirləri altında insidentsiz başa çatıb.

Çıxışdan sonra Ararat Mirzoyan AŞPA üzvlərinin suallarını cavablandırıb. Deputatlar sülh danışıqlarının gedişi, sərhədlərin delimitasiyası, regional kommunikasiyaların açılması, eləcə də insan hüquqları və təhlükəsizlik məsələləri ilə bağlı mövqelərlə maraqlanıblar.

Plenar müzakirələrdən sonra Avropa Şurası Parlament Assambleyasının qərargahında Ermənistan ilə AŞPA arasında xüsusi poçt markasının təqdimatı və imzalanma mərasimi keçirilib. Tədbir Ermənistanın Avropa Şurasına üzvlüyünün 25-ci ildönümünə həsr olunub və bu münasibətlə xatirə poçt markası dövriyyəyə buraxılıb.

Mərasimdə AŞPA prezidenti Petra Bayr və Ermənistanın xarici işlər naziri Ararat Mirzoyan iştirak ediblər. Tədbirin rəsmi proqramına əsasən, poçt markasının təqdimatından sonra AŞPA çərçivəsində əməkdaşlığın mövcud vəziyyəti və regional münasibətlərin gələcək inkişaf perspektivləri ətrafında fikir mübadiləsi aparılıb.

Qeyd olunub ki, bu cür simvolik tədbirlər Avropa Şurası ilə üzv ölkələr arasında siyasi dialoqun və institusional əməkdaşlığın gücləndirilməsinə xidmət edir.