Vəfa Nağı Azərbaycan seçki tarixində müsbət nümunəyə imza atmış şəxslərdəndir.

2019-cü ilin bələdiyyə seçkilərində gözəl bir nümunə yaratdı. Baxmayaraq ki, seçkidən öncə əsas rəqibi - Xolqaraqaşlı bələdiyyə sədri Əlibala Səlimov ona qarşı çirkin kampaniya apardı.

Vəfa Nağıya kimi bələdiyyə seçkilərinə belə diqqət çəkən olmamışdı.

Seçki günü Vəfa Nağının namizəd olduğu məntəqədə müşahidəçi olmuşdum. İlk dəfə idi ki, seçicilərin seçki məntəqəsində səs vermək üçün növbəyə düzüldüyünü gördüm. Həmin seçici növbəsi hansısa inzibati resurslar hesabına deyil, Vəfa Nağıya olan inama görə idi. (Həmin vaxtı yazdığım statusu, şəkilləri və səslərin sayılmasının videosunu şərhdə yerləşdirəcəm).

Seçki günü də əlindən gələni etdilər ki, Vəfa Nağı bələdiyyəyə üzv seçilməsin. Əlibala Səlimov bilirdi ki, Vəfa Nağı bələdiyyə üzvü seçilsə, ona ciddi əngəl olacaq və o əvvəlki kimi kənddə öz istədiklərini edə bilməyəcək. Əlibala Səlimov yanılmamışdı, elə də oldu. Çünki Vəfa Nağı haqlı, Əlibala Səlimov isə haqsız tərəf idi.

Bir sözlə, Vəfa Nağıya qarşı çirkin kampaniya aparan və uzun illər kənddə hökmranlıq edən Əlibaba Səlimov sonda Vəfa Nağıya məğlub oldu, bələdiyyə sədrliyindən istefa verdi və onun kənddəki hökmranlığına son qoyuldu. İllərlə kənd camaatının əlindən alınmış torpaq sahələri isə özlərinə qaytarıldı. Bütün bunlarda Vəfa Nağının rolu oldu.

Vəfa Nağının Türkiyədə təhsilini başa vurandan sonra Neftçalanın kəndinə qayıdıb kənddə qadınlar üçün tikiş sexi açması da başqa bir müsbət nümunə idi.
Vəfa Nağı indi də Neftçaladan deputatlığa namizəddir. Bələdiyyə seçkilərində olduğu kimi indi də maraqlı və uğurlu seçki kampaniyası aparır.

Bir neçə gün öncə qarşıma bir video çıxdı. Videoda bir qrup Neftçala sakini Vəfa Nağıya su problemlərindən şikayət edirdilər. Vəfa xanım da həmin sakinlərlə birlikdə su idarəsinin rəhbərini tapıb problemi onun diqqətinə çatdırdılar. Məmur əvvəl problemi danmaq istədi. Amma sonradan problemin olduğunu etiraf etdi və aradan qaldıracağına söz verdi. Bu asan başa gəlmədi, Vəfa xanım sakinlərlə birlikdə axıra kimi dirəşdi, hətta o məmura sakinlərin içdikləri bulanıq sudan da içirdilər. Əgər Vəfa xanım namizəd ola-ola bir problemi aradan qaldıra bildisə, deməli deputat olacağı halda daha çox problemləri aradan qaldıra bilər. Öncə bunun üçün istək, iradə lazımdır. Vəfa xanım isə Neftçalada bunları çoxdan nümayiş etdirib.

Kimlərsə Vəfa xanımın ictimai-siyasi baxışlarını, dünyagörüşünü bəyənməyə bilər. Bu, normaldır. Amma öncə insanın əməlinə qiymət vermək lazımdır. Vəfa xanım isə əməlləri ilə uzun illər bir kəndə öz istədiyini edə bilən bir bələdiyyə sədrini vəzifəsindən getməsinə, camaatın torpaqlarını özünə qaytarılmasına, su problemlərini həll edilməsinə, bir qrup işsiz qadına iş yeri açılmasına nail olmuş şəxsdir. Vəfa xanım bunları edərkən əlində xüsusi bir səlahiyyəti də olmayıb, sadəcə yuxarıda dediyim kimi istəyi, iradəsi ilə bunları edə bilib.
Neftçalalılar şanslıdırlar ki, onların rastına belə bir şəxs çıxıb.

İndi də Vəfa xanımın əleyhinə qaralama kampaniyası aparılır. Yaxşı olar ki, o kampaniyanı aparanlar Əlibala Səlimovu yada salsınlar. Əlibala Səlimov neçə məğlub oldusa, bu gün Vəfa xanıma qarşı qarayaxma kampaniyası aparanlar da bir gün məğlub olacaqlar. Ona görə ki, haqsız tərəfdirlər.

Bu yazı Vəfa xanımın seçki təbliğatı üçün deyil, uğursuzluqların bol olduğu bir ölkədə bir uğur haqda sadəcə qeydlərdir.