Nyu-Yorkda yerləşən Jurnalistləri Müdafiə Komitəsi (JMK) azərbaycanlı jurnalist Şəhla Kərimin saxlanılmasını və peşə fəaliyyətini həyata keçirdiyi yerdən zorla kənarlaşdırılmasını pisləyib.

"Jurnalist Şəhla Kərimi seçkiləri və onlarla bağlı etirazları işıqlandırmasına mane olmaq üçün peşə fəaliyyətini həyata keçirdiyi yerdən zorla yüzlərlə kilometr uzaqlaşdırıblar. Bu, Azərbaycanda KİV-in təqibinin və mətbuata qarşı qanunsuzluğun daha bir nümunəsidir", bu barədə JMK-nin Avropa və Mərkəzi Asiya üzrə proqram koordinatoru Gülnoza Said bildirib.

Azərbaycan hakimiyyəti Kərimin saxlanılmasında təqsirli olanları müəyyən etməli və məsuliyyətə cəlb etməli, jurnalist avadanlığının ona qaytarılmasını təmin etməlidir, deyə Səid bildirib.

Bir neçə müstəqil xəbər agentliyinin ştatdankənar jurnalisti olan Kərim müxalifətdən deputatlığa namizəd Vəfa Nağının (Nağıyevanın) Azərbaycanda 1 sentyabr parlament seçkilərində təxmin olunan saxtalaşdırmalara qarşı etirazını işıqlandırırdı. 10-a yaxın mülki geyimli və tibbi maskalı şəxs jurnalisti, namizədi və namizədin Neftçala şəhərindəki köməkçisini saxlayıb. Hər üçü təxminən 180 km məsafədə yerləşən Bakıya aparılıb və burada sərbəst buraxılıb.

Kərim JMK-ya bildirib ki, o, dəfələrlə jurnalist olduğunu bildirib, hadisədən yayımladığı videoda da bu, eşidilir, lakin hüquq-mühafizə orqanlarının əməkdaşları buna məhəl qoymayıblar, formalı polis isə müdaxilə etməyib.

Jurnalistin sözlərinə görə, onu saxlayan şəxslər "əmri" yerinə yetirdiklərini bildiriblər və onlara mobil telefonla növbəti addımları haqqında göstərişlər verilirdi.

Kərim bildirib ki, təxminən dörd saat sonra onları Bakı ətrafında maşından endiriblər və Kərimin mikrofonunu saxlayıb, telefonları qaytarıblar.

"Seçkiləri işıqlandıran Azərbaycan jurnalistləri seçki məntəqələrindən qovulduqlarını, seçki komissiyalarının əməkdaşlarının onların kameralarını sındırdıqlarını, mobil telefonları ilə seçkiləri saxtalaşdıran şəxslərin aldıqlarını bildiriblər.

Mətbuata qarşı davam edən repressiyalar 13 müstəqil jurnalistin böyük iqtisadi cinayətlərdə ittiham olunmasına gətirib çıxarıb, bu da müstəqil KİV-ləri seçkiləri adekvat şəkildə işıqlandırmaq imkanından məhrum edib", deyə JMK-nın məlumatında bildirilir.

Komitə Azərbaycan DİN-ə elektron məktub göndərib, lakin cavab almayıb.

Jurnalist özü Turan-a bildirib ki, yaxın günlərdə vəkillə məsləhətləşmələrdən sonra qeyd edilən hadisə ilə bağlı rəsmi şikayət verəcək.