"ABŞ Prezidenti Donald Trampın Cənab Prezidentə təbrik məktubu göndərməsi dövlətlərimiz arası uğurlu əməkdaşlığın və ortaq dəyərlərin nəticəsidir"

Gündəm

17-05-2020, 09:30

"ABŞ Prezidenti Donald Trampın Cənab Prezidentə təbrik məktubu göndərməsi dövlətlərimiz arası uğurlu əməkdaşlığın və ortaq dəyərlərin nəticəsidir" Bunu Milli Məclisin deputatı Məzahir Əfəndiyev Amerika Birləşmiş Ştatlarının Prezidenti Donald Trampın Prezident İlham Əliyevə 28 May – Respublika Günü münasibətilə ünvanladığı təbrik məktubuna münasibətində bildirib.

Millət vəkili deyib ki, məktubda ABŞ Prezidenti Azərbaycanın suverenliyini və müstəqilliyini güclü şəkildə dəstəklədiyini bildirib, dövlətimizin beynəlxalq təhlükəsizliyini gücləndirmək, Avropanın enerji marşrutlarını və mənbələrini şaxələndirmək yönündə siyasətini rəğbətlə qarşılanıb. Eyni zamanda, məktubda xüsusilə Dağlıq Qarabağ münaqişəsinin sülh yolu ilə ATƏT-in Minsk qrupu çərçivəsində həll edilməsində ABŞ-ın marağının olduğu qeyd edilib: "ABŞ Prezidenti tərəfindən göndərilən bu və bundan öncəki ənənəvi məktubların əsas məntiqi ondan ibarətdir ki, Cənab Prezidentin Azərbaycanın ərazi bütövlüyünün bərpasına, müstəqilliyinin qorunmasına və Azərbaycan xalqının sosial rifahının daha da yaxşılaşdırılmasına yönəlik idarəetmə modelinə olan dəstəyi nümayiş etdirməkdir.
Nəzərinizə çatdırım ki, ABŞ – Azərbaycan əlaqələri möhkəm dayaqlara, ortaq dəyərlərə və qarşılıqlı maraqlara əsaslanır, Azərbaycan və ABŞ arasında müxtəlif sahələr üzrə mütəmadi şəkildə qarşılıqlı səfərlər, təmaslar və dialoqlar keçirilir. Eyni zamanda, Azərbaycan ABŞ-ın Cənubi Qafqaz regionunda ən iri ticarət tərəfdaşıdır".

Millət vəkili həmçinin Trampın məktubda "koronavirus pandemiyası ilə üzləşdiyimiz bir vaxtda Birləşmiş Ştatlar Azərbaycan xalqının yanındadır" fikrinə də toxunaraq bildirib ki, pandemiyaya qarşı mübarizədə Azərbaycan hökumətinin apardığı siyasət dünya dövlətləri tərəfindən yüksək qiymətləndirilib: "Həyata keçirilən bütün tədbirlər əhalinin sağlamlığının, təhlükəsizliyinin qorunmasi ilə yanaşı, sosial rifahının yaxşılaşdırılması olub. Hökumət maraqlı operativlik nümayiş etdirdi. Sosial dəstək paketləri, sahibkarlarla bağlı proqramlar, neftin qiymətinin sürətlə aşağı düşdüyü bir vaxtda manatın məzənnəsini təmkinlə qoruması və cəmiyyətə özgüvənliklə “qorxmayın” mesajı verməsi ürəyəyatımlı oldu".

Millət vəkili bildirib ki, ilk növbədə diqqətəlayiq məqam Azərbaycan hökümətinin çevik və yüksək səviyyədə mövcud vəziyyətə uyğunlaşması və islahatların ardıcıl formada davam etdirilməsidir: “Burada xüsusilə qürurverici məqam isə cənab Prezidentin təşəbbüsü ilə Türkdilli Dövlətlərin videokonfrans vasitəsi ilə fövqəladə Zirvə görüşünün keçirilməsidir. Bu ölkəmizin koronavirus pandemiyasına qarşı mübarizədə nəinki milli, hətta regional və beynəlxalq səviyyədə hərəkətverici qüvvə olmaq istədiyindən və buna imkan verən potensialından irəli gəlir.

Müşavirə bir daha aydın şəkildə nümayiş etdirdi ki, makroiqtisadi sabitliyin qorunması, əhalinin məşğulluq vəziyyətinin yaxşılaşdırılması və sahibkarlıq subyektlərinin dəyə biləcək zərərin minimuma endirilməsi kimi məsələlər də daxil olmaqla əhalimizin sosial rifahının qorunması və davamlı formada yaxşılaşdırılması yönündə bütün məsələlər dövlət gündəliyində başlıca yer alır. Bu məcrada xüsusilə son dövrlər inkişaf edən kənd təsərrüfatı sahəsində mümkün durğunluğun qarşısının alınmasına yönəlik tədbirləri vurğulamaq lazımdır”.

M.Əfəndiyev Koronavirusla mübarizədə Azərbaycanın həyata keçirdiyi tədbirlərin Ümumdünya Səhiyyə Təşkilatının (ÜST) baş direktoru Tedros Adanom Qebreyesus tərəfindən də dəyərləndirdildiyini xatırladıb: "Baş direktor Azərbaycan Prezidenti İlham Əliyevin təşəbbüsü əsasında Türk Şurasının videokonfrans vasitəsilə keçirilən fövqəladə Zirvə görüşündə bildirib ki, COVID-19 Strateji Hazırlıq və Reaksiya Planımıza dəstək verən bütün üzv dövlətlərə və tərəfdaşlarımıza təşəkkür etmək istəyirəm. 800 milyon dollara qədər maliyyə dəstəyi verilib. Xüsusilə, beş milyon dollar dəyərində yardımla bu işə öz töhfəsini verən Azərbaycan hökumətinə və xalqına təşəkkür edirəm". Əminliklə deyə bilərik ki, koronavirusla mübarizədə Azərbaycan üzüağ çıxıb".

Deputat onu da vurğulayıb ki, dünya üçün belə çətin vaxtlarda ABŞ kimi Azərbaycan da xarici ölkələrə və təşkilatlara yardım əlini əsirgəməyib: "Azərbaycan dövləti pandemiya dövründə Ümümdünya Səhiyyə Təşkilatına, Çin Xalq Respublikası, İtaliya, Özbəkistan, İran, Qırğızıstan, Tacikistan, Moldova, Serbiyaya humanitar yardım edib”.

foto.info.az