“Meclis.info” saytının rəhbəri İmran Əliyevin həbsdə saxlanma müddəti daha 3 ay artırılıb. Bu haqda Xətai Rayon Məhkəməsi noyabrın 18-də qərar çıxarıb.

Meydan TV xəbər verir ki, prokuror İmran Əliyev haqqında həbs qətimkan tədbirinin daha 3 ay uzadılması haqda təqdimat verib. Amma o da, vəkili də buna etiraz edib, təqdimatın əsassız olduğunu bildiriblər.

Peşə fəaliyyətinə görə həbs olunduğunu deyən İ.Əliyev hakimin diqqətinə çatdırıb ki, kəskin ağrılardan əziyyət çəkir, lazımi tibbi yardımı ala bilmir, bundan başqa, həbsdə olduğu müddətdə təxminən 15 kiloqram çəki itirib.

İmran Əliyevin məhkəmədə də halsız olduğu qeyd edilir.

Bakı Şəhər Baş Polis İdarəsinin müstəntiqi isə İmran Əliyev haqqında həbs qətimkan tədbirinin uzadılmasını bir çox istintaq hərəkətlərinin aparılmalı olması ilə izah edib və əlavə edib ki, istintaqdan yayına biləcəyi, şahidlərə təsir göstərmək ehtimalı olduğu üçün onun azadlıqda qalması məqsədəuyğun deyil.

Hakim təqdimatı təmin edib və ictimai fəalın saxlanma müddətini daha 3 ay – fevralın 19-na qədər uzadıb.

İmran Əliyevin vəkili qərardan apelyasiya şikayəti verəcəyini bildirib.


Dünən Bakı Apelyasiya Məhkəməsində İmran Əliyevlə bağlı Xətai Rayon Məhkəməsinin başqa bir qərarından verilən şikayətə baxılıb. Onun ev dustaqlığına buraxılması ilə bağlı müraciətə Xətai Rayon Məhkəməsi rədd cavabı vermişdi. Bakı Apelyasiya Məhkəməsi həmin qərardan verilən şikayəti təmin etməyib.

İmran Əliyevin yaxınları onun yaxın günlərdə aclıq aksiyasına başlamaq niyyətində olduğunu deyiblər. Yaxınları bunu haqqındakı həbs qətimkan tədbirinin növbəti dəfə uzadılması, onun lazımi tibbi yardımı ala bilməməsi ilə izah edirlər.

İmran Əliyev aprelin 18-də Türkiyəyə gedərkən hava limanında saxlanılıb. O həbsindən bir gün sonra polislərin işgəncəsinə məruz qaldığını bildirib, məhkəməyə gətiriləndə üzərində xəsarət izləri görünüb.
İ.Əliyev “Abzas Media işi” ilə bağlı saxlanılıb, Cinayət Məcəlləsinin 206.3.2-ci (bir qrup şəxs tərəfindən qaçaqmalçılıq) maddəsilə ittiham irəli sürülsə də, daha sonra onun işi ayrılıb. İctimai fəala Cinayət Məcəlləsinin 206.3.1 (qaçaqmalçılıq – təkrar törədildikdə) maddəsilə yeni ittiham irəli sürülüb.

İmran Əliyev ittihamı rədd edir, Milli Məclisin və deputatların fəaliyyətini araşdırdığına və bu istiqamətdə fəaliyyət göstərən sayta rəhbərlik etdiyinə görə cəzalandırıldığını deyir.