Fatimə Mövlamlı: “Jurnalistika cinayət deyil!”

“Meydan TV işi” üzrə həbs olunan jurnalist Fatimə Mövlamlı barəsində seçilmiş həbs qətimkan tədbirinin müddəti daha 3 ay uzadılıb. Bu barədə jurnalist təcridxanadan yazdığı məktubla məlumat verib və Xətai Rayon Məhkəməsində – hakim Rəfael Sadıqovun sədrliyi ilə keçirilən prosesdə etdiyi çıxışın mətnini ictimailəşdirib.

Fatimə Mövlamlı çıxışında bildirib ki, həbsinin səbəbi sırf jurnalist fəaliyyəti ilə bağlıdır və onu həbsdə saxlamaq üçün heç bir qanuni əsas yoxdur:

“Evimdən tapıldığı iddia olunan 13.500 avro və polis maşınında hazır gözləyən hal şahidləri – bunların hamısı qurmadır. Mən artıq 4 aydır haqsız yerə həbsdəyəm və bu gün siz bu müddəti sadəcə bir az da uzadırsınız. Olsun. Amma tarix bizi – müstəqil jurnalistləri – adlarımızla xatırlayacaq, siz isə bir ovuc şərbaz və müti kimi yazılacaqsınız.”

Mövlamlı ölkə rəhbərliyini də ittiham edərək bildirib ki, bu həbslərin arxasında birbaşa Prezident İlham Əliyev dayanır:

“Qaçaqmalçı adı bizə yapışmaz. Qaçaqmalçının yekəsi də, sifarişi verən də şəxsən İlham Əliyevin özüdür!”

Jurnalist özünün və həmkarlarının gördüyü işi müdafiə edərək həbsdə belə vicdan rahatlığı və gələcəyə inam içində olduğunu bildirib:

“Müstəqil mətbuat senzuralardan, ölümlərdən keçib bu günə gəlib. Bugünkü repressiyalar da bizi dayandıra bilməyəcək. Biz olmasaq da, bizim əvəzimizdən yazın və unutmayın: Jurnalistika cinayət deyil!”

Fatimə Mövlamlı, Abzas Media jurnalistləri ilə birlikdə ötən aylarda kütləvi şəkildə həbs olunan və müxtəlif ittihamlarla üzləşən jurnalistlərdən biridir. Onların həbsi yerli və beynəlxalq insan haqları təşkilatları tərəfindən siyasi motivli kimi qiymətləndirilir.