Bu gün Xətai Rayon Məhkəməsində “Meydan TV işi” üzrə həbs olunan jurnalistlərin istintaq müddətinin daha 3 ay artırılması ilə bağlı prokurorluğun təqdimatına baxılıb. Məhkəmə jurnalistlərin həbs müddətinin uzadılması qərarını qüvvədə saxlayıb.

Həbs müddəti uzadılan şəxslər:
• Ramin Cəbrayılzadə (Deko)
• Aysel Umudova
• Xəyalə Ağayeva
• Natiq Cavadlı
• Şəmşad Ağayev (Ağa) – “arqument.az” saytının baş redaktoru
• Fatimə Mövlamlı
• Ülviyyə Quliyeva (Əli)
• Ülvi Tahirov – vətəndaş cəmiyyəti fəalı, Meydan TV ilə əlaqəsi yoxdur
• Aynur Qənbərova (Elgünəş)
• Nurlan Qəhrəmanlı (Libre)
• Aytac Əhmədova (Tapdıq)

Vəkillər məhkəmənin bu qərarına etiraz etdiklərini bildiriblər və apellyasiya şikayəti verəcəklərini açıqlayıblar.

Jurnalistlərə qarşı Cinayət Məcəlləsinin 206.3.2-ci maddəsi (qaçaqmalçılıq – əvvəlcədən əlbir olan bir qrup şəxs tərəfindən törədildikdə) ilə ittiham irəli sürülüb. Onlar ittihamları qətiyyətlə rədd edir, həbs olunmalarının səbəbi kimi tənqidçi jurnalist fəaliyyətlərini göstərirlər.

Kontekst:
• İlk həbslər 2024-cü il dekabrın 6-da baş verib.
• Sonrakı aylarda daha çox jurnalist və ictimai fəal bu iş üzrə saxlanılıb.
• Ümumilikdə 30-dək jurnalist və fəal bu və ya oxşar ittihamlarla həbsdə saxlanılır.

Beynəlxalq reaksiyalar:
Beynəlxalq insan haqları təşkilatları və Qərb rəsmiləri Azərbaycan hökumətini siyasi motivli həbslərə son qoymağa və jurnalistləri azad etməyə çağırırlar.

Statistika:
Azərbaycan hazırda həbsdə olan jurnalistlərin sayına görə Avropada ilk beşlikdədir – Rusiya (38), Belarus (30), Ukrayna (28), Azərbaycan. (25) və Türkiyə (20)