Daxili İşlər Nazirliyinin (DİN) Baş Narkotiklərlə Mübarizə İdarəsi (BNMİ) tərəfindən Bakı şəhərində və bölgələrdə narkotik vasitələrin qanunsuz dövriyyəsinə qarşı genişmiqyaslı əməliyyatlar keçirilib. Nəticədə mütəşəkkil dəstənin daha 19 üzvü saxlanılıb.

DİN-in yaydığı rəsmi məlumata görə, saxlanılan şəxslərdən ümumilikdə 175 kiloqram narkotik vasitə və psixotrop maddə – marixuana, heroin, tiryək, metamfetamin, həmçinin 690 ədəd güclü təsiredici “metadon” həbi, elektron tərəzilər və bank kartları aşkarlanaraq maddi sübut kimi götürülüb.

Məlum olub ki, saxlanılanların əksəriyyəti narkotik vasitələrin qaçaqmalçılıq yolu ilə ölkəyə gətirilməsində və satışında birbaşa iştirak edən əsas şəxslərdir.

Faktlarla bağlı Azərbaycan Respublikası Cinayət Məcəlləsinin müvafiq maddələri ilə cinayət işləri başlanılıb. Saxlanılan hər bir şəxs barəsində həbs qətimkan tədbiri seçilib.

DİN bildirir ki, narkotiklərin qanunsuz dövriyyəsinə qarşı mübarizə tədbirləri qətiyyətlə davam etdiriləcək. İctimaiyyətə bu istiqamətdə aparılan əməliyyatların nəticələri barədə əlavə məlumatlar veriləcək.