USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Taleh Bağırzadə karserə salındı: “Ya burada öl, ya da ciddi rejimə keç”
Müsəlman Birliyi Hərəkatının sədri, ilahiyyatçı Taleh Bağırzadənin 12 saylı cəzaçəkmə müəssisəsində cərimə təcridxanasına (karserə) salındığı bildirilir. Bu barədə məlumatı onun ailə üzvləri veriblər.
Ailəsinin sözlərinə görə, Bağırzadə iyunun 19-da müəssisənin daxili qaydalarına əməl etmədiyi iddiası ilə 3 günlük karser cəzası alıb. Cəzasını başa vurduqdan sonra, iyunun 22-də ona daha 5 günlük əlavə karser cəzası verilib.
Taleh Bağırzadənin verdiyi məlumata əsasən, iyunun 13-də gecə saatlarında saxlanıldığı müəssisənin dam örtüyü çöküb və bir sıra binalar qəzalı vəziyyətə düşüb. Hadisədən sonra bəzi məhbuslar başqa yerlərə köçürülsə də, o da daxil olmaqla bir çox məhkumlar riskli şəraitdə saxlanılmağa davam edib.
“Mənə dedilər ki, ya bu dağıntılar altında qalmalıyam, ya da ciddi-qapalı rejimə köçürülməliyəm. Hər iki seçimi rədd etdiyimə görə məhbusların səhər və axşam sayımına çıxmadım. Buna görə karserə salındım”, – deyə Taleh Bağırzadə ailəsinə bildirib.
İlahiyyatçının sözlərinə görə, karserdən sonra onu PKT-yə (kamera tipli otaq) köçürəcəkləri gözlənilir. Ardınca məhkəmə qarşısına çıxarılaraq Umbakıdakı ciddi-qapalı rejimli həbsxanaya göndərilə bilər.
O, müəssisə rəhbərliyinə etiraz etdiyini, lakin ona açıq şəkildə “ya ciddi rejimə gedirsən, ya da burada ölürsən” deyildiyini bildirib.
Taleh Bağırzadə 2015-ci ilin noyabrında Nardaranda baş verən hadisələrdən sonra həbs olunub. O, dövlət çevrilişinə cəhd, qanunsuz silah saxlama və digər ağır ittihamlarla 20 il azadlıqdan məhrum edilib. İlahiyyatçı bu ittihamları rədd edir və siyasi motivlərlə həbs olunduğunu bildirir.
