USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Bəhruz Səmədov aclığı dayandırıb: “Dəri ekzeması ağırlaşıb, üzü qanamağa başlayıb”
Dövlətə xəyanət ittihamı ilə 15 il azadlıqdan məhrum edilən fəal Bəhruz Səmədov aclıq aksiyasını dayandırıb. Bu barədə feminist fəal Gülnarə Mehdiyeva məlumat yayıb.
Onun sözlərinə görə, Bəhruzun əvvəllər də əziyyət çəkdiyi dəri ekzeması ağırlaşıb, vəziyyəti pisləşib:
“Bəhruzun üzü qanamağa başlayıb. Sağlamlıq durumu və yaşlı nənəsinin israrları səbəbilə aclığı dayandırmalı olub”.
Aclıq aksiyası ölüm aclığı idi
Bəhruz Səmədov həbsinə etiraz olaraq iyunun 19-da ölüm aclığına başlamışdı. Onun iyunun 23-də Bakı Ağır Cinayətlər Məhkəməsinin qərarı ilə 15 il azadlıqdan məhrum edildiyi bildirilmişdi.
Kimdir Bəhruz Səmədov?
Bəhruz Səmədov Çexiyanın Karlov Universitetində doktorantura təhsili alırdı. O, Azərbaycan-Ermənistan münaqişəsi, insan hüquqları və sülh mövzularında elmi araşdırmaları və tənqidi çıxışları ilə tanınıb.
O, 2024-cü ilin avqustunda Dövlət Təhlükəsizliyi Xidməti tərəfindən saxlanılıb və barəsində Cinayət Məcəlləsinin 274-cü (dövlətə xəyanət) maddəsi ilə ittiham irəli sürülüb.
Səmədov ittihamları rədd edir və bildirib ki, “müharibə əleyhdarı və sülh tərəfdarı olduğu üçün” hədəf alınıb. Onun sözlərinə görə, ittihamın heç bir sübutu yoxdur və yalnız fikirlərinə görə cəzalandırılıb:
“Ermənistan xüsusi xidmət orqanları ilə əməkdaşlıqda ittiham olunuram, amma bunu təsdiqləyən bircə sübut belə yoxdur. Məqalələrim və çıxışlarım sülh çağırışlarıdır, buna görə susdurulmağa çalışıram”.
Hazırda onun işi ilə bağlı beynəlxalq insan haqları təşkilatlarının və elmi dairələrin reaksiyası gözlənilir.
