Yunanıstanda Polşa pasportuna malik olan 26 yaşlı Azərbaycan əsilli şəxs Souda Bay hərbi-dəniz bazası ərazisində casusluq şübhəsi ilə saxlanılıb. Bu barədə Euronews məlumat yayıb.

Souda Bay bazası NATO və Yunanıstan Hərbi Dəniz Qüvvələrinin Şərqi Aralıq dənizindəki ən önəmli strateji obyektlərindən biri hesab olunur. Məlumata görə, şübhəli şəxs bazanın yaxınlığında yerləşən mehmanxanada qalaraq əraziyə nəzarət edən kameralar və texniki vasitələrlə bazaya gələn və oradan çıxan gəmiləri izləyib.

Milli Kəşfiyyat Xidməti (EYP) və Yunanıstan polisinin birgə keçirdiyi əməliyyat nəticəsində saxlanılan şəxsin kamerası və noutbukunda 5000-dən çox fayl – əsasən hərbi gəmilərin təsvirləri, fotoşəkillər və video görüntülər aşkarlanıb.

İstintaqın ilkin versiyasına görə, həmin şəxs bazaya nəzarəti planlı şəkildə həyata keçirib. O, mehmanın pulunu bir ay əvvəlcədən ödəyərək otaqda qapalı şəkildə qalmaqla diqqət çəkməməyə çalışıb. Eyni zamanda, çox az hallarda oteldən çıxaraq yalnız müşahidə etdiyi məqamları qeydiyyata alıb.

Məsələ ilə bağlı hələlik nə Azərbaycan rəsmiləri, nə də Polşa hökuməti rəsmi açıqlama yayıb.

Yunan mətbuatında bu saxlanılma “xarici dövlətin xeyrinə casusluq fəaliyyəti” kimi qiymətləndirilib. İstintaqın daha geniş miqyasda araşdırıldığı, şəxsin hansı ölkəyə işlədiyinin müəyyənləşdirilməyə çalışıldığı bildirilir.

Hadisə NATO-nun təhlükəsizlik gündəmində də narahatlıq doğurub.