ABŞ-ın sabiq prezidenti Donald Tramp İranla bağlı növbəti qalmaqallı açıqlaması ilə gündəmə gəlib. Tramp rəsmi X (keçmiş Twitter) hesabında etdiyi paylaşımda İranın mövcud hakimiyyətini sərt tənqid edib və dolayı şəkildə rejim dəyişikliyini dəstəklədiyini bildirib.

”‘Rejim Dəyişikliyi’ ifadəsini işlətmək siyasi baxımdan düzgün deyil, amma indiki İran rejimi İRANı YENİDƏN BÖYÜK edə bilmirsə, niyə rejim dəyişikliyi olmasın??? MIGA!!!” – deyə Tramp bildirib.

“MIGA” ifadəsi onun məşhur “Make America Great Again” (Amerikanı Yenidən Böyük Et) şüarına istinadla, bu dəfə “Make Iran Great Again” (İranı Yenidən Böyük Et) mənasını verir.

Trampın bu paylaşımı beynəlxalq münasibətlər və diplomatik etika baxımından ciddi tənqidlərə səbəb olub. Siyasi analitiklər qeyd edirlər ki, belə bir çağırış ABŞ-İran münasibətlərində gərginliyi daha da artırmaqla yanaşı, regionda qeyri-sabitliyi dərinləşdirə bilər.

İran rəsmiləri hələlik Trampın paylaşımına rəsmi cavab verməsə də, mütəxəssislər yaxın günlərdə Tehranın sərt mövqe sərgiləyəcəyini istisna etmirlər.