Tovuz şəhərində yerləşən dönərxanada kütləvi zəhərlənmə hadisəsi qeydə alınıb. Hadisə iyunun 25-də Mirzə Ələkbər Sabir küçəsində fəaliyyət göstərən “022” dönər evində baş verib. Zəhərlənmə nəticəsində ümumilikdə 35 nəfər – 16 kişi və 19 qadın – tibbi yardıma ehtiyac duyub.

Tibbi Ərazi Bölmələrini İdarəetmə Birliyi (TƏBİB) məlumat yayıb ki, zərərçəkənlərin hər birinə zəruri tibbi xidmət göstərilib və vəziyyətləri qənaətbəxş qiymətləndirilərək evə buraxılıblar.

Qida Təhlükəsizliyi Agentliyi hadisədən sonra dönərxanada yoxlamalara başlayıb və ilkin nəticələrə əsasən, obyektin fəaliyyəti müvəqqəti olaraq dayandırılıb.

Mütəxəssislər dönərdən zəhərlənmələrin qarşısını almaq üçün sanitar-gigiyenik qaydalara ciddi əməl olunmasının vacibliyini vurğulayırlar. Qida məhsullarının keyfiyyətli olması və dönərin köz və ya kömürdə bişirilməsi tövsiyə olunur.

Qeyd edək ki, bu cür hallar Azərbaycanda vaxtaşırı təkrarlanır. Sonuncu belə hadisə iyunun 19-da Naxçıvanda baş vermiş, 17 nəfər dönərdən zəhərlənmişdi.