Ermənistanın hüquq-mühafizə orqanları “Müqəddəs mübarizə” müxalifət hərəkatının rəhbəri, arxiyepiskop Baqrat Qalstanyanı həbs edib. Bu barədə məlumatı ölkənin İstintaq Komitəsi yayıb.

Rəsmi açıqlamada bildirilir ki, arxiyepiskop və onun tərəfdarları hakimiyyəti qeyri-konstitusion yolla ələ keçirmək, o cümlədən terror aktları hazırlamaq niyyətində olmaqda şübhəli bilinir.

İstintaq Komitəsinin versiyasına görə, Qalstanyan 2024-cü ilin noyabr ayından başlayaraq zorakı yollarla hakimiyyəti dəyişmək üçün hazırlıqlara başlayıb. İddia olunur ki, bu çərçivədə keçmiş hərbçilər və hüquq-mühafizə əməkdaşları da daxil olmaqla 200-250 nəfərlik qruplar təşkil edilib və bu qrupların hər biri konkret tapşırıqlar üzrə müstəqil şəkildə fəaliyyət göstərməli imiş.

Komitə bildirib ki, planlaşdırılan fəaliyyətlər nəticəsində Ermənistanda 36 saat ərzində xaos və sabitliyin pozulması nəzərdə tutulubmuş.

Baş nazir Nikol Paşinyan da məsələyə münasibət bildirərək qeyd edib ki, ölkədə genişmiqyaslı dövlət çevrilişinə cəhdin qarşısı alınıb.

Xatırladaq ki, 2024-cü ilin noyabrından bəri Ermənistan müxalifəti, xüsusilə də Baqrat Qalstanyanın rəhbərlik etdiyi hərəkat, Paşinyanın istefası, növbədənkənar parlament seçkilərinin keçirilməsi və ölkənin xarici siyasət kursunun dəyişdirilməsi tələbi ilə genişmiqyaslı etiraz aksiyaları təşkil edirdi.

Hazırda istintaq davam edir, amma Qalstanyanın tərəfdarları onun siyasi motivli həbs olunduğunu iddia edir. Hakimiyyət isə hərəkətlərin dövlət təhlükəsizliyi üçün təhdid təşkil etdiyini vurğulayır.