“Meydan TV işi” üzrə həbs olunan jurnalist Ülviyyə Əli (Quliyeva) polis tərəfindən tərtib edilən protokolların saxtalaşdırıldığını deyir.

Bu barədə məlumatı onun yaxınları yayıb. Bildirilib ki, Ülviyyə Əli bu fikirləri iyunun 24-də Xətai Rayon Məhkəməsində barəsindəki həbs qətimkan tədbirinin daha 3 ay uzadılması ilə bağlı keçirilən iclasda səsləndirib.

Jurnalist bildirib ki, saxlanıldığı və evində axtarış aparıldığı zaman polisin yol verdiyi qanunsuzluqlarla bağlı protokollara çoxsaylı yazılı qeydlər edib. O, konkret nümunələr də sadalayıb:
• Bakı Şəhər Baş Polis İdarəsində (BŞBPİ) zorakılıq və zorlanma ilə hədələnməsi
• Evində vəkilsiz axtarış aparılması
• Özünün seçdiyi vəkillə təmin olunmaması
• Müstəntiq Əlibala Hacıyev və polis əməkdaşlarının pul sayarkən əlcək taxmaması

Lakin Ülviyyə Əli bildirib ki, istintaq tərəfindən vəkillərin vəsatətlərinə verilmiş cavabda bu qeydlərin heç birinin protokollarda yer almadığı, hətta dövlət hesabına təyin olunan vəkil Sevdiyar Bayramovun onun xahişi ilə seçildiyinin iddia edildiyi qeyd olunub.

“Bu cavabdan aydın olur ki, istintaq saxtakarlıq edib, mənim protokollara yazdığım qeydləri silib və imzamı da saxtalaşdırıb. Azərbaycanda qanun və hüquq sadəcə müqəvvadır, real hüquqi mexanizm yoxdur,” – deyə Ülviyyə Əli bildirib.

Ülviyyə Əli mayın 7-də həbs edilib. Barəsində Cinayət Məcəlləsinin 206.3.2-ci maddəsi (qaçaqmalçılıq – qabaqcadan əlbir olan bir qrup şəxs tərəfindən törədildikdə) ilə ittiham irəli sürülüb.

O, əvvəllər “Amerikanın Səsi” ilə əməkdaşlıq edib, daha sonra isə öz sosial media hesablarında siyasi motivli məhkəmə işlərindən reportajlar yayımlayıb.