“Toplum TV işi” üzrə həbsdə olan jurnalist Fərid İsmayılov səhhətindəki problemlərlə əlaqədar məhkəmə proseslərinə aparılıb-gətirilməsinə etirazını bildirib. O, bu narazılığını iyunun 23-də Bakı Ağır Cinayətlər Məhkəməsində keçirilən prosesdə hakimə çatdırıb.

Jurnalistin yaxınlarının “Toplum TV”yə verdiyi məlumata görə, İsmayılovun qanında şəkərin səviyyəsi aşağıdır. O, səhər saatlarında qida qəbul etmədən və zəif vəziyyətdə məhkəməyə gətirilməsinin sağlamlığını ciddi şəkildə pozduğunu deyib. Fərid İsmayılov baş ağrısı, göz qaralması və digər əlamətlər yaşadığını bildirib.

Hakim qarşısında çıxış edən jurnalist acı-ironiya ilə deyib:

“Əgər bizim sonumuz da ‘Abzas’çılar kimi olacaqsa, onda mənim hökmümü indidən oxuyun, mən hər dəfə bura gəlib-getmək məcburiyyətində olmayım”.

Yaxınlarının bildirdiyinə görə, təcridxanada ona sistem qoşulsa da, bu, laqeyd şəkildə, qolu nəfəslikdən çıxarılaraq həyata keçirilir. Həmçinin, Fərid İsmayılov miqrendən əziyyət çəkir və mütəmadi dərman qəbul etməlidir.

Qeyd edək ki, Fərid İsmayılov ötən il martın 6-da saxlanılmış, əvvəlcə polis nəzarətinə verilsə də, bu ilin yanvarında Xətai Rayon Məhkəməsinin qərarı ilə həbs olunub.

“Toplum TV işi” çərçivəsində ümumilikdə 10 nəfər barəsində cinayət işi açılıb. Həbs edilənlər arasında III Respublika Platformasının spikeri Akif Qurbanov, qurucu üzv Ruslan İzzətli, “Toplum TV”nin həmtəsisçisi Ələsgər Məmmədli, videoredaktor Müşviq Cabbar, jurnalist Fərid İsmayılov və digərləri var.

Əvvəlcə qaçaqmalçılıq ittihamı ilə üzləşən jurnalistlərə qarşı sonradan ittihamlar ağırlaşdırılıb. Onlar ittihamları qəbul etmir, həbslərinin siyasi sifariş olduğunu bildirirlər.

Xatırladaq ki, 2023-cü ilin noyabrından başlayaraq Azərbaycanda təxminən 30 jurnalist və ictimai fəal bu kimi ittihamlarla həbs olunub. Hakimiyyət isə heç kimin peşə və ya siyasi fəaliyyətinə görə təqib olunmadığını, ölkədə bütün hüquq və azadlıqların təmin olunduğunu bəyan edir.