İyunun 20-də Bakı Ağır Cinayətlər Məhkəməsi “Abzas Media” işi üzrə höküm çıxardı. Qurumun direktoru, jurnalist Ülvi Həsənli 9 il müddətinə azadlıqdan məhrum edildi. Məhkəmədən öncə o, son sözlə çıxış edərək həm ona yönəldilmiş ittihamları cavablandırdı, həm də Azərbaycandakı ədalətsiz sistemə qarşı sərt mesajlar verdi.

“Azərbaycanda doğru-düzgün ədalət sistemi olsaydı, bu zalda biz yox, korrupsionerlər, işgəncə kralları əyləşərdi”, – deyə Ülvi Həsənli çıxışına başladı.

İttihamlar və cavablar

Həsənli öz çıxışında ona qarşı irəli sürülmüş ittihamların – qaçaqmalçılıq, çirkli pulların yuyulması, qanunsuz sahibkarlıq, vergidən yayınma və sənəd saxtalaşdırılması – əsassız və sübutsuz olduğunu bildirdi. O qeyd etdi ki:
• “Qaçaqmalçılıq” ittihamı 7 nəfərin dövlət sərhədini pozaraq gizli şəkildə pul keçirməsi anlamına gəlir. Halbuki bu barədə heç bir sübut yoxdur, 184 dəfə ölkəyə giriş-çıxış etmiş şəxslər heç vaxt gömrükdə saxlanılmayıb.
• “Çirkli pulların yuyulması” ittihamı isə beynəlxalq təşkilatlardan alınan qrantlara əsaslanır. Həsənli bildirir ki, bu vəsaitlər uzun illərdir dövlət və yarı-rəsmi qurumlar tərəfindən də alınıb və hökumət onları öz məqsədlərinə uyğun istifadə edib:

“BMT, AŞ, USAID, AB və s. təşkilatlardan alınan pullar indi birdən-birə ‘kriminal vəsait’ oldu?”

• “Qanunsuz sahibkarlıq” və “vergidən yayınma” ittihamlarına gəlincə, o vurğuladı ki, media fəaliyyəti qeyri-kommersiya xarakterlidir, ortada nə ticarət, nə gəlir var. İddia edilən “64 min manatlıq vergi borcu” elektron fayllara əsaslanır, həmin fayllar isə sadəcə “təklif” adlanan qeyri-rəsmi sənədlərdir.

“Heç bir normal ölkənin istintaqı bu tip faylları sübut kimi qəbul etməz”, – deyə Həsənli bildirdi.

“Əsl cinayətkarlar bizi ittiham edir”

Jurnalist çıxışında vurğuladı ki, əslində onların ifşa etdiyi korrupsiya faktları – milyardların ölkədən çıxarılması, ofşor əməliyyatlar, tender fırıldaqları – bu gün elə öz üzərlərinə “ittiham” kimi qaytarılıb: “Bizim araşdırdığımız cinayətləri indi bizə yükləyirlər. Bu, hökumətin öz cinayətlərini ört-basdır etmək üçün yoludur.”

O qeyd etdi ki, “Abzas Media”nın araşdırmaları Prezident İlham Əliyev və onun ətrafını hədəf aldığı üçün jurnalistlər hədəfə alınıb: “İlham Əliyevin çıxışları, prokurorluğun və məhkəmənin davranışları sübut edir ki, bu işin sifarişi prezidentdən gəlir.”

“Mübarizə susmayacaq, əksinə böyüyəcək”

Ülvi Həsənli çıxışında həmrəylik göstərən 40-dan çox beynəlxalq jurnalistə, həmkarlarına və ailələrinə təşəkkür edib. Bildirib ki, onların həbsinə rəğmən Abzas Media-nın araşdırmaları beynəlxalq mediada davam etdirilir: “Bizim fəaliyyətimiz susdurulmadı, əksinə daha geniş yayıldı.”

O, Azərbaycan jurnalistikasının bu gün “dəmir daban altında əzildiyini”, lakin mübarizə aparan jurnalistlərin bu dövrdə daha böyük əhəmiyyət daşıdığını bildirib.

“Valideynlərimiz başlarını dik tutsunlar”

Çıxışının sonunda Ülvi Həsənli ailə üzvlərinə və valideynlərinə səslənib: “Biz sizə uşaqlıqdan öyrətdiyiniz kimi – yalan danışmadan, oğurluq etmədən, şərə qarşı dayanaraq – böyüdük. Ona görə üzülməyin. Sizin oğlunuz şərə, yalana xidmət etmir. Başınızı dik tutun!”