İyunun 24-də Ali Məhkəmədə iqtisadçı və iş adamı Nazim Bəydəmirli barəsində çıxarılan hökmə dair kassasiya şikayətinə baxılıb. Hakim Şahin Yusifovun sədrlik etdiyi məhkəmə heyəti şikayəti təmin etməyərək, əvvəlki instansiyaların çıxardığı hökmü qüvvədə saxlayıb.

Nazim Bəydəmirli öz istəyi ilə məhkəmə prosesində iştirak etməyib. Onun vəkili Aqil Layıc müdafiə çıxışında iqtisadçıya qarşı irəli sürülmüş ittihamların sübut olunmadığını, cinayət işinə bəraətverici əsaslarla xitam verilməli olduğunu bildirib. Layıc Ali Məhkəmənin qərarından Avropa İnsan Hüquqları Məhkəməsinə şikayət edəcəklərini açıqlayıb.

Nazim Bəydəmirli 2023-cü ilin iyulunda – Göygöldəki Söyüdlü ekoloji etirazları zamanı polislərin davranışlarını ictimai şəkildə tənqid etdikdən sonra saxlanılıb. Ona əvvəlcə hədə-qorxu ilə əmlak tələb etmə, sonradan isə təhdid yolu ilə tələb etmə maddələri ilə ittiham irəli sürülüb. 2024-cü ilin sentyabrında Bəydəmirli 8 il müddətinə azadlıqdan məhrum edilib.

Bəydəmirli bütün ittihamları rədd edir və özünü “ekologiya məhbusu” adlandırır. Hüquq müdafiə təşkilatları da onu siyasi məhbus kimi tanıyıb.

Qeyd edək ki, Bəydəmirli uzun illər sahibkarlıq fəaliyyəti ilə məşğul olub, eyni zamanda, iqtisadi şərhləri və hökumət siyasətinə tənqidi münasibəti ilə tanınıb.