USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Tofiq Yaqublu son söz üçün məhkəmədən vaxt istəyib
Bakı Ağır Cinayətlər Məhkəməsində Milli Şuranın və Müsavat Partiyasının üzvü, dələduzluqda ittiham olunan Tofiq Yaqublunun məhkəməsi davam edir.
Bu iş hakim Elnur Nuriyevin icraatındadır.
Ötən məhkəmə iclasında prokuror məhkəmədən Yaqubluya 10 il cəza istəmişdi.
Fevralın 26-da Yaqublunun vəkilləri müdafiə çıxışı ediblər.
Onlar Yaqublunun siyasi fəaliyyətinə görə həbs olunduğunu önə çəkiblər. Vəkillər bildiriblər ki, aylardır davam edən məhkəmədə Yaqubluya qarşı dələduzluq ittihamları darmadağın olub. Müdafiə tərəfi məhkəmədən Yaqublu barəsində bəraət hökmü çıxarılmasını istəyiblər.
Digər təqsirləndirilən şəxs Elnur Məmmədov son söz deyib. O, cinayət törətdiyini, əməlindən peşman olduğunu deyərək yüngül cəza istəyib.
Zərərçəkən Elşən Hüseynov və nümayəndəsi məhkəmə iclasında yenə iştirak etməyib.
Hakim son söz çıxışı üçün Tofiq Yaqubluya müraciət edib. Yaqublu son sözə hazırlaşmaq üçün iki həftə vaxt istəyib. Hakim bir həftə vaxt verib. Növbəti məhkəmə iclası martın 5-nə təyin olunub.
Tofiq Yaqublu ötən il dekabrın 14-də həbs edilib. Ona qarşı Cinayət Məcəlləsinin 178.3.2-ci (külli miqdarda ziyan vurmaqla dələduzluq), 320.1-ci (rəsmi sənədləri, dövlət təltiflərini, möhürləri, ştampları, blankları saxtalaşdırma, qanunsuz hazırlama və ya satma) və 320.2-ci (bilərəkdən saxta sənədlərdən istifadə etmə) maddələri ilə cinayət işi başlanıb.
Tofiq Yaqublu bu iddiaları qəbul etmir və həbsinin siyasi sifariş, ittihamların isə saxta olduğunu bildirir.
Azərbaycan rəsmiləri isə ölkədə heç kimin siyasi baxışlarına görə təqib edilmədiyini və bütün fundamental hüquqların tam təmin edildiyini bəyan edirlər.
